चितवन – पहिराे खसेर बन्द भएकाे मुग्लिन–नारायणगढ सडक खण्ड सञ्चालनमा आएकाे छ । भरतपुर महानगरपालिका २९ काे केराबारी र अठार किलाेमा खसेकाे पहिराे हटाएर केही बेरअघि सडक दुईतर्फी खुलाइएकाे जिल्ला प्रहरी कार्यालय चितवनले जनाएकाे छ।  

केराबारीको पहिरो ६ बजे र अठार किलाेकाे पहिराे साढे ६ बजे हटाएर बाटो खुलाइएको प्रहरीले जनाएको छ । १८ किलोमा लेदोसहितको पहिरो खसेको थियो । यसअघि आज बिहान सवा ८ बजेको समयमा भरतपुर महानगरपालिका २९ काे सत्र किलो भन्ने ठाउँमा लेदोसहित पहिरो खसेपछि दुईतर्फी बाटो बन्द भएको थियो ।

यस सडक खण्डमा लगातार पहिराे खसिरहेकाले पहिराे पूर्णरूपमा पन्छाउन समस्या भइरहेकाे छ । पहिराे हटाएर गाडी सञ्चालनमा ल्याउने गरेकाे भए पनि फेरि अर्काे ठाउँमा पहिराे खसेर सडक बन्द हुने गरेकाे छ । 

लगातारको वर्षाका कारण पहिरो खस्दा केही राष्ट्रिय राजमार्ग र विभिन्न जिल्लाका ग्रामीण सडकहरू बन्द भएका छन् । राष्ट्रिय सडक र राजमार्गहरूमा भएको अवरोध केही समयमा हटाउने गरेको भए पनि ग्रामीण तथा शाखा सडकहरू बन्द रहेका छन् । 

तस्बिर : अनु पुर्कुटीकाे फेसबुकबाट