बर्दिया - बर्दियाका नदी तथा खाेलामा बाढी आएपछि माछा मार्ने तथा दाउरा सङ्कलन गर्नेकाे भिड लागेकाे छ ।

गेरुवा नदी, बबई नदी, आराेही खाेलालगायतमा आएकाे बाढीमा माछा मार्न र दाउरा सङ्कलन गर्न स्थानीयकाे भिड लागेकाे हाे । 

गुलरिया नगरपालिका, ठाकुरबाबा नगरपालिका, बारबर्दिया नगरपालिका, मधुवन नगरपालिकालगायतमा स्थानीयहरु माछा मार्न र दाउरा सङ्कलनका लागि तटीय क्षेत्रमा जम्मा भएका जिल्ला प्रहरी कार्यालय बर्दियाका डीएसपी हिक्मत बाेहाेराले बताउनु भयाे । 

जिल्ला प्रशासन कार्यालय र पालिकाले बाढी आएकाले नदी र खाेलाकाे किनारामा नजान स्थानीयलाई आग्रह गरेकाे छ । तर, स्थानीहरु भने दाउरा सङ्कलन गर्न र माछा मार्न बिहानैदेखि व्यस्त छन् ।

यसैबीच, गएरातिदेखिकाे निरन्तरकाे वर्षापछि बर्दियाकाे ठाकुरबाबाका विभिन्न ठाउँ डुबानमा परेकाे छ । बबई नदीमा पानीकाे सतहले खतराकाे तह पार गरेकाले सतर्कता अपनाउन आग्रह गरिएकाे छ ।