मुसिकोट नगरपालिकाले दियो ९० जनालाई गाउँमै रोजगारी

 वैशाख ५, २०७६ बिहीबार १७:१९:४७ | जनार्दन घिमिरे
unn.prixa.net

गुल्मी – गुल्मीको मुसिकोट नगरपालिकाले ९० जनालाई गाउँमै रोजगारी दिएको छ । नगर क्षेत्रभित्र रहेका सडकलाई बाह्रै महिना सञ्चालनमा ल्याएर ९० जना त्यही सडकमा काम गर्ने गरी नियुक्ति दिएको हो । 

नगरपालिकाले गरेको कार्यक्रममा श्रम, रोजगार तथा सामाजिक सुरक्षा मन्त्री गोकर्ण विष्टले कामदारलाई नियुक्तिपत्र र काम गर्न चाहिने सामग्री हस्तान्तरण गर्नुभयो ।

मन्त्री विष्टले नगरपालिकाले ९० जनालाई गाउँमै रोजगारी दिएकोमा खुशी व्यक्त गर्दै  काम सानो ठूलो नहुने बताउनुभयो ।

साथै उहाँले अब केही समयपछि प्रत्येक स्थानीय तहमा चार सय युवाहरुलाई कुनै न कुनै रोजगारी सिर्जना गर्ने बताउनुभयो । मन्त्रीविष्टले स्थानीय सम्भावनाका आधारमा गाउँमै रोजगार सिर्जना गर्न खोजिरहेको बताउँदै अब कोही पनि बेरोजगार भएर बस्नु नपर्ने बताउनुभयो ।

मुसिकोट नगरपालिकाले ‘लेन्थ वर्कर’ व्यवस्थापन कार्यविधि–२०७५ निर्माण गरेको र त्यसैका आधारमा व्यवस्थापन समिति गठन गरेर नियुक्त गरिएका कामदारलाई परिचालन गर्ने नगरपालिकाका प्रमुख सोमनाथ सापकोटाले बताउनुभयो ।

नगरपालिकाले एक जना कामदारको पारिश्रमिक मासिक १३ हजार चार सय ५० रुपैयाँ तोकेको छ । उनीहरुले वर्षभरि नै मोटरबाटो मर्मत गर्ने झाडी सरसफाइ गर्ने, साना पहिराहरु पन्छाउने, नाली काम गर्नेछन् ।

मुसिकोट नगरपालिकाका नौ वडामा १० जनाका दरले ९० जना कामदार भए पनि सडकको दूरीको आधारमा उनीहरुलाई परिचालन गर्ने निमित्त प्रमुख प्रशासकीय अधिकृत नवराज भण्डारीले बताउनुभयो ।

यो कामका लागि १ सय २६ जनाले आवेदन दिएकोमा एक सय १० जना अन्तर्वार्तामा सहभागी भएका थिए । छनौट समितिको मूल्याङ्कनका आधारमा ९० जनालाई छनोट गरिएको नगरपालिकाले जनाएको छ । 

सडक सफा र मर्मतका लागि कामदार लगाउँदा डोजरभन्दा महङ्गो पर्ने  भए पनि डोजरलाई पैसा दिएर बाहिर पठाउनुभन्दा स्थानीयलाई काम दिन यस्तो निर्णय गरिएको  नगर प्रमुख सापकोटाले बताउनुभयो । 

तस्बिर- कृष्ण छन्तेलकाे फेसबुकबाट

जनार्दन घिमिरे

गुल्मीका क्रियाशील पत्रकार जनार्दन घिमिरे लामो समयदेखि उज्यालोमा कार्यरत हुनुहुन्छ । 

1 Comments

  • Lilawati Aryal

    April 18, 2019, 5:35 p.m.

    काम भएर मात्रै भएन। कामले माम पनि खान पुग्नु पर्‍याे।

तपाईको प्रतिक्रिया

समाचार

लोकप्रिय

१

नेपालमा पहिलो पटक हुन लागेको भलिबल लिगको लोगो र नारा सार्वजनिक

२

अपदस्थ प्रधानमन्त्री हसिनालाई भारतबाट फिर्ता ल्याउने बङ्गलादेशको तयारी

३

च्याम्पियन्स ट्रफीकाे खेल तालिका सार्वजनिक, भारत र पाकिस्तानबीचकाे खेल फेब्रुअरी २३ मा

४

नासाको अन्तरिक्ष यान सूर्यको सबैभन्दा नजिक पुग्यो

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

सीप नसिकी विदेश जाँदा पछुतो भयो, अब त बिना सीप जान्न भो

विदेशको काम, सीप भए हुन्छ सुरक्षा र राम्रो दाम

मेरो कथा मेरो भोगाई