वैशाखमा मात्रै ४८ हजारभन्दा बढी वैदेशिक रोजगारीमा, अदक्ष कामदारको संख्या धेरै

जेठ २०, २०७६ सोमबार १६:६:२२ | उज्यालो सहकर्मी

काठमाण्डौ – वैशाख महिनामा मात्रै ४८ हजार ७५६ जना नेपाली वैदेशिक रोजगारीमा गएका छन् । यसमध्ये ४५ हजार ८७८ जना पुरुष र २ हजार ८७८ जना महिलाले अन्तिम श्रम स्वीकृति लिएको वैदेशिक रोजगार विभागले जनाएको छ ।

अन्तिम श्रम स्वीकृति लिनेमा धेरैजसो अदक्ष कामदार रहेका छन् । एक महिनाको अवधिमा मात्रै २६ हजार ८२५ जना पुरुष र १ हजार ७२५ जना महिला गरी २८ हजार ५५० जना अदक्ष कामदार विदेशिएका छन् ।

दक्ष कामदारको सँख्या बढ्दै

विदेशिनेमध्ये धेरै अदक्ष कामदार भए पनि पछिल्लोपट दक्ष कामदार बढेका विभागले जनाएको छ । वैशाखमा वैदेशिक रोजगारीमा जानेमध्ये १६ हजार ४६४ दक्ष कामदार छन् । उच्च सीप भएका कामदारको भने कम संख्यामा विदेशिएका छन् । वैशाख विदेशिनेमध्ये १७ जना मात्रै उच्च सीप भएका कामदार छन् ।

यसैगरी ३ हजार ६२२ जना अर्ध दक्ष कामदारले वैशाखमा अन्तिम स्वीकृति लिएका छन् । वैशाखमा विदेशिनेमध्ये १०३ जना ‘प्रोफेसनल’ छन् । मागपत्रका आधारमा प्रोफेसनल भन्नाले डाक्टर, इञ्जिनियर, प्राध्यापक लगायतलाई बुझिने वैदेशिक रोजगार विभागकका कम्युटर इन्जिनियर राजु श्रेष्ठले बताउनुभयो ।

तालिम लिएका र त्यसमा पनि विशिष्ट दक्षता भएकालाई उच्च दक्ष, तालिम लिएर कुनै पनि पेशासँग सम्बन्धित सीप भएका र त्यही काममा जानेलाई सिपयुक्त, काम धेरथोर जानेको तर सीप भएका प्रमाण नभएकालाई अर्ध दक्ष र सीप नभएका कामदारलाई अदक्ष भनेर मागपत्रमा नै वर्गीकरण गरिएको हुने र त्यही अनुसार विभागले कामदारलाई अन्तिम श्रम स्वीकृति दिने गरेको पनि उहाँले बताउनुभयो ।

झण्डै २५ सय मलेसिया गए

गएको वर्षको जेठ २ गतेदेखि बन्द रहेको मलेसियाको रोजगारी बन्द छ । तर कलिङ भिसा आइसकेका कामदारको हकमा भने सरकारले अन्तिम श्रम स्वीकृति दिने निर्णय गरेको थियो ।

कलिङ भिसा आएकाले २ हजार ४५३ जनाले मलेसिया जानका लागि अन्तिम श्रम स्वीकृति लिएका छन् । अन्तिम स्वीकृति लिनेमा २ हजार ४१९ पुरुष र ३४ जना महिला रहेका छन् ।

यस्तै एक महिनाको अवधिमा सबैभन्दा धेरै साउदीका लागि अन्तिम स्वीकृति लिएका छन् । ५ हजार २२२ जनाले साउदी जानका लागि अन्तिम स्वीकृति लिएको विभागले जनाएको छ । साउदीपछि कतार जानका लागि ५ हजार २२२ जनाले अन्तिम स्वीकृति लिएका छन् ।

कतारपछि तेस्रो नम्बरमा यूएई जानेको संख्या छ । एक महिनाको अवधिमा ४ हजार २५३ जनाले यूएईका लागि अन्तिम स्वीकृति लिएका छन् । बहराइनका लागि ३६१, कुवेतका लागि १ हजार ५८४ तथा ओमानका लागि १७८ जनाले अन्तिम श्रम स्वीकृति लिएका छन् ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)