जिम्बावे र अफगानिस्तानबीचको पहिलो टेस्टमा कीर्तिमानै कीर्तिमान

पुष १६, २०८१ मंगलबार १२:८:९ | एजेन्सी

काठमाण्डाै – जिम्बावे र अफगानिस्तानबीचको पहिलो टेस्ट क्रिकेटमा कीर्तिमानको ओइरो लागेको छ । बुलावायोको क्वीन्स स्पोर्ट्स क्लबमा भएको खेल बराबरीमा सकिएको थियो ।

अफगानिस्तानको पहिलो पारीमा ६ सय ९९ र घरेलु टोली जिम्बावेले पहिलो पारीमा ५ सय ८६ र दोस्रो पारीमा ४ विकेट गुमाएर १ सय ४२ रन बनाउँदा खेल बराबरीमा सकिएको हो । बुलावायोमा अफगानिस्तानले बनाएको ६ सय ९९ रन टेस्ट क्रिकेटमा उसको सर्वाधिक योगफल हो ।

यस्तै अफगानिस्तान सबैभन्दा कम खेल खेलेर टेस्ट क्रिकेटको एउटै पारीमा ६ सय रन बनाउने टोली बनेको छ । सन् २०१८ मा पहिलो टेस्ट खेलेको अफगानिस्तानले १० औं खेलमा यो उपलब्धि हासिल गरेको हो ।

हशमतुल्लाह शाहिदीले बनाएको २ सय ४६ रन अफगानिस्तानका लागि सर्वाधिक व्यक्तिगत योगफल हो । हशमतुल्लाहको यो दोस्रो शतक हो ।

यस्तै दोहोरो शतक बनाएका अफगानिस्तानकै अर्का ब्याटर रहमत शाहले पनि कीर्तिमान बनाएका छन् । उनी टेस्ट क्रिकेटमा पहिलो दुई शतकलाई दोहोरो शतकमा परिणत गर्ने पाँचौं खेलाडी बनेका छन् ।

यसअघि इङ्ग्ल्यान्डका वाली हमोन्ड, वेस्ट इन्डिजका रोहन कान्हाई, पाकिस्तानका जहीर अब्बास र भारता विनोद काम्ब्लीले यो उपलब्धि हासिल गरेका थिए ।

खेलको तेस्रो दिन ९५ ओभर ब्याटिङ गरेका रहमत र शाहिदी एकैदिनको खेलमा सबैभन्दा धेरै ओभर खेल्ने तेस्रो जोडी बनेका छन् । यस्तै जिम्बावेले बनाएको ५ सय ८६ रन टेस्ट क्रिकेटमा उसको सर्वाधिक योगफल हो ।

यस्तै एउटै टेस्टमा दुवै टोलीले आफ्नो सर्वाधिक योगफल बनाउने दुलर्भ कीर्तिमान पनि बनेको छ । रहमत र शाहिदीबीच तेस्रो विकेटका लागि भएको ३ सय ६४ रनको साझेदारी अफगानिस्तानका लागि टेस्ट क्रिकेटमा कुनै पनि विकेटका लािग सबैभन्दा धेरै रनको साझेदारी हो र यो जिम्बावेसँगको टेस्टमा कुनै पनि विकेटको लागि भएको दोस्रो ठूलो साझेदारी पनि हो ।

यस्तै जिम्बावेका २१ वर्ष ४६ दिनका ब्रायन बेनेट बुलावायोमा टेस्ट क्रिकेटमा शतक बनाउने र पाँच विकेट लिने सबैभन्दा कान्छो खेलाडी बनेका छन् । बेनेट जिम्बावेका लागि टेस्टमा शतक र पाँच विकेट लिने दोस्रो खेलाडी पनि बनेका छन् ।

जिम्बावे र अफगानिस्तानबीचकाे दाेस्राे तथा अन्तिम टेस्ट आउँदाे बिहीवारदेखि बुलावायाेमा शुरू हुनेछ ।

अन्तिम अपडेट: पुस १९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्