विप्लव समूहको प्रतिक्रिया – सरकारको प्रस्तुति हेरेर जवाफ दिन्छौँ

फागुन २९, २०७५ बुधबार ९:१६:३४ | उज्यालो सहकर्मी

काठमाण्डौ - नेत्रविक्रम चन्द ‘विप्लव’ समूहलाई सरकारले प्रतिबन्ध लगाउने निर्णय गरेसँगै अब के होला भन्ने चिन्ता बढेको छ ।

सरकारले गठन गरेको राजनीतिक वार्ता टोलीले वार्ताका लागि आह्वान गर्दा पनि वार्तामा नआई विप्लव समूह आपराधिक कृयाकलापमा केन्द्रित भएकाले उसको गतिबिधिमा प्रतिबन्ध लगाउन परेको सरकारले बताइसकेको छ ।

मंगलबार बसेको मन्त्रीपरिषद् बैठकले विप्लव समूहलाई प्रतिबन्ध लगाउने निर्णय गरेसँगै अब देश फेरि द्वन्द्वमा जाने हो कि भन्ने आशंका र चिन्ता सहितको विभिन्न टिप्पणीहरु सामाजिक सञ्जालमा आएका छन् ।

सीके राउत समूहलाई जस्तै विप्लव समूहलाई पनि वार्ताकै माध्यमबाट शान्तिपूर्ण राजनीतिमा अवतरण गराउनु पर्नेमा सरकारले प्रतिबन्ध लगाउने निर्णय गर्नु हतारो भएको कतिपयको भनाइ छ ।

नख्खुमा एकजनाको ज्यान जाने गरी भएको बम विस्फोट, बसुन्धारामा वैदेशिक रोजगार व्यवसायीको घरमा भएको बम विस्फोट र देशका विभिन्न ठाउँमा भएका बम विस्फोटले विप्लव समूह आपराधिक गतिविधिमा केन्द्रित भएको सरकारले ठहर गरेको हो ।

‘विप्लवलाई कम आँक्नु हुन्न : चौकीमै हान्न सक्छन्’

धरान र कपिलवस्तुमा पक्राउ परेका विप्लव समूहका कार्यकर्ताबाट अत्याधुनिक हतियारहरु बरामद हुनुले विप्लव समूहसँग सरकार झनै सशंकित बनेकोे थियो ।

सरकारले प्रतिवन्ध लगाउने निर्णय गरेपछि अब विप्लव समूह के गर्छ ? भन्ने प्रश्नमा विप्लव नेतृत्वको नेकपाका पोलिटब्युरो सदस्य मोहन कार्की ‘जीवन्त’ले सरकारको निर्णयको विरुद्धमा प्रतिकार गर्ने बताउनुभयो ।

‘अहिले पनि हामी आफ्नो राजनीतिक अभियान चलाइरहेका छौँ, एकीकृत जनक्रान्तिको अभियान चलिरहेको छ,’ उहाँले भन्नुभयो, ‘सरकारको यो निर्णयले फेरि देशलाई द्वन्द्वमा धकेल्ने काम गरेको छ, हामीलाई भूमिगत हुन बाध्य बनाइएको छ ।’

विप्लव नेतृत्वको नेकपाका गतिविधिमाथि प्रतिबन्ध लगाउने सरकारकाे निर्णय !

सरकारले अहिलेसम्म आफूहरुलाई वार्ताका लागि औपचारिक आह्वान नै नगरेको भन्दै उहाँले अब वार्ताको औचित्य नै नरहेको पनि बताउनुभयो । अबको बाटो भनेको सरकार कसरी प्रस्तुत हुन्छ त्यहीअनुरुप नै पार्टीले जवाफ दिने उहाँको भनाइ छ ।

आफ्नो पार्टी दलाल, पूँजीवादी र प्रतिगामीको विरोधमा जनसत्ता निर्माण गरेर राजनीतिक संघर्षमा रहेको भन्दै उहाँले नागरिकका अधिकार स्थापित गर्ने आन्दोलनमा लागेको पार्टीलाई हस्तक्षेप गर्न खोजिए परिणाम नराम्रो आउने चेतावनी दिनुभयो ।

विप्लवको गतिविधिमा निगरानी बढाउने प्रहरीको तयारी

विप्लव समूहले सैन्य दस्ता पनि तयार पारेको छ रे भन्ने प्रश्नमा उहाँले अहिले पार्टीको उद्देश्य सैन्य दस्ता निर्माणमा नभई राजनीतिक जागरुकता बढाउने अभियानमा केन्द्रित रहेको बताउनुभयो ।

‘अहिले सैन्य दस्ता निर्माण गर्ने हाम्रो प्रमुख उद्देश्य होइन, तर पनि राज्यको व्यवहार ठिक भएन भने त्यसका लागि पनि पार्टी तयारी अवस्थामा रहेको उहाँले खुलाउनुभयो ।

सरकारले देशलाई फेरि द्वन्द्वमा धकेलेर अन्धकारमा लैजानका लागि आफ्नो पार्टीमाथि प्रतिबन्धको निर्णय गरेको उहाँको दावी छ ।

अन्तिम अपडेट: माघ १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्