‘खत्तम बा ! गोड काटेके परै’

चैत १८, २०७५ सोमबार २०:५४:४२ | रासस

नारायण ढुङ्गाना/रासस ।

काठमाण्डाै - बाराको फेटा गाउँपालिका– ६ का ३३ वर्षीय मुनाफ अन्सारीको परिवार आइतबार साँझ सपरिवार बरण्डामा बसेर सुखदुःखका कुरा साट्दै थिए । साँझको अन्दाजी ७ः३० बजेको थियो । एक्कासि असिना पानी पर्‍यो । एक्कै छिनमा नसोचेको हावाहुरी (हुण्डरी)आयो ।

'पूरै जमिन नै घुमे झैँ गरी भुँमरी पर्‍यो, गाउँ नै उडाउन थाल्यो, घर भकाभक ढल्न थाल्यो', हिजोको घटना सुनाउँदै अन्सारीले भन्नुभयो, 'अनि अल्लाहको नाम लिन थाल्यौँ ।' यत्तिकैमा उहाँको तीन कोठे घरको टायल पनि खसेर सबैलाई थिचेको उहाँले बताउनुभयो ।

जीवन सबैको एकै ठाउँमा गएझैँ भएको अन्सारीले सुनाउनुभयो । तर आफू सामान्य चोट लागे पनि जोगिएकाले खोतलखातल गरेर अन्य सदस्यलाई निकालेको काठमाण्डाैको महाराजगञ्जस्थित शिक्षण अस्पतालमा आज साँझ अन्सारीले बताउनुभयो । आफू घाइते भए पनि बुबा गम्भीर रहनुभएकाले उपचारका लागि अन्य सदस्यलाई छाडेर उहाँ काठमाण्डाै आउनुभएको हो ।

'सबै पुरिएका थिए, मैले एक एक गर्दै भत्केको छानो पन्छाएर निकालेँ', कहालीलाग्दो घटना सम्झँदै अन्सारीले मलिन स्वरमा सुनाउनुभयो । उहाँलाई सामान्य घाउचोट मात्रै लागेकाले पनि परिवारका सदस्यलाई निकालेर मर्नबाट भने जोगाउनुभएको थियो । परिवारका अन्य सदस्यलाई स्थानीय अस्पतालमा उपचाररत छाडेर उहाँ गम्भीर बिरामी हुनुभएका ५९ वर्षीय बुबा मोबारक मियाँ अन्सारीलाई लिएर उपचारका लागि यहाँको शिक्षण अस्पतालमा आउनुभएको हो । उहाँहरुलाई नेपाली सेनाको हेलिकप्टरले काठमाडौँ ल्याएको हो ।

बुबाको बायाँ पिँडुल्लामा घरको छानो खसेर गम्भीर घाइते बनाएको छ । हिजोको घटनाले अहिले पनि उहाँलाई बेलाबेलामा झसङ, झसङ पार्छ । तर पनि बुबाको उपचारका लागि उहाँ काठमाडौँमा रहेका केही स्थानीय र आफन्तको सहयोगमा खटिरहनुभएको छ । उहाँको मोबाइलमा तारन्तार घरपरिवारबाट फोनसमेत आइरहेको छ । बुबाको अवस्थाबारेमा उताबाट जानकारी मागिन्छ भने यताबाट अन्य परिवारका सदस्यको स्वास्थ्य अवस्थाबारे उहाँले फोनबाटै जानकारी लिइरहनुभएको छ ।

रासससँग कुराकानी हुँदै गर्दा उहाँलाई एउटा फोन आयो । 'खत्तम बा ! गोड काटेके परै', आफ्नै भाषामा मलिन स्वरमा मुनाफ अन्सारीले जवाफ फर्काउनुभयो । त्यसबेला उहाँले फोनमा धेरै कुरा गर्न सक्नुभएन । गला अड्कियो । फोन राख्नुभयो ।

'डाक्टरले गोडा काट्नु पर्छ भनेको छ, आज राति शल्यक्रिया हुँदैछ', उहाँले भन्नुभयो । साँझ ७ बजेसम्म शल्यक्रियाकै लागि चार पोका रगत जोरजाम भइसकेको छ । गम्भीर घाइते मोवारकलाई शिक्षण अस्पतालको आकस्मिक कक्षमा अक्सिजन दिएर राखिको छ । कसैलाई भेट्न दिइएको छैन । होसमा भए पनि राम्ररी बोल्ने अवस्थामा बुबा नरहेको अन्सारीले सुनाउनुभयो । उहाँको पिँडुल्ल्ला क्षत्विक्षत छ । हड्डीसमेत टुक्रिएकाले जोड्ने अवस्था नरहेको चिकित्सकको भनाइ उद्धृत गर्दै अन्सारीले जानकारी दिनुभयो ।

अन्सारी परिवारका सबै घाइते

आफ्नो पिठ्यूँमा लागको चोट देखाउँदै मुनाफ अन्सारीले सबै परिवार घाइते भएको बताउनुभयो । बगलको एक घरका तीन जना आँखै अगाडि बितेको उहाँले बताउनुभयो । आफू अली कम घाइते भएकाले अन्यलाई अस्पताल लैजानेदेखि बुबालाई काठमाडौँमा उपचारका लागिसमेत आफैँ खटिनुभएको छ ।

उहाँका अनुसार बुबा मोवारकसहित ५५ वर्षीया आमा झोहरा, श्रीमती २७ वर्षीया मेरिना, २३ वर्षीय बुहारी राफा (खुट्टा भाँचिएको), दुई वर्षकी छोरी सहना, सात वर्षीय छोरा फराहान अन्सारी, डेढ वर्षका भतिज फराहाद अन्सारी र १५ वर्षकी छोरी अर्बुन घाइते भएका छन् । बुबालाई वीरगञ्जस्थित हेल्थ केयर सेन्टरमा उपचार नहुने भएपछि सेनाको हेलिकप्टरमा काठमाडौँ ल्याइएको हो ।

पटेल परिवारको पनि पीडा

दाँहिने घुँडामा गम्भीर घाइते भएका सोही गाउँका ३६ वर्षीय त्रिचन पटेलको खुट्टासमेत भाँचिएको छ । हावाहुरीका कारण त्रिचनका दाइ ४० वर्षीय ताराचन, छोरा निखिल, विकास, छोरी पूजा र पूजाकी २० दिने शिशु अनुषालाई समेत चोट लागेको छ । उनीहरुको नारायणी उपक्षेत्रीय अस्पतालमा उपचार भइरहेकाले गम्भीर भएका त्रिचनलाई भने सेनाको हेलिकप्टरमा काठमाडौँस्थित शिक्षण अस्पतालमा ल्याइएको छ ।

आजै उहाँको पनि शल्यक्रिया गर्ने तयारी रहेको त्रिचनकी श्रीमती रीनादेवीले बताउनुभयो । कहालीलाग्दो घटना आफूले सम्झँदा पनि डर लाग्ने उहाँको भनाइ थियो । आज साँझ नै स्वास्थ्य मन्त्रालयका सचिव पुष्पा चौधरी र प्रवक्ता महेन्द्र श्रेष्ठले घाइतेको अवस्थाबारे जानकारी लिनुभएको छ । दुई जना गम्भीर रहेको र अन्यको अवस्था अलि राम्रो रहेको श्रेष्ठले बताउनुभयो ।

शिक्षण अस्पतालमा अहिले बारा फेटा गाउँपालिकाका ३६ वर्षीय त्रिचन पटेल, ५९ वर्षीय मोबारक महमद मियाँसहित ५० वर्षीय सुरेश पटेल, तीन वर्षीय अमन पटेल, ३५ वर्षीया गीतादेवी पटेल, ३३ वर्षीय मुना अन्सारी र नौ वर्षीय सलिना खातुनको उपचार भइरहेको छ ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्