किशोरी बेचबिखनको आरोपमा एकजना पक्राउ, मुख्य अभियुक्त फरार

जेठ ८, २०७६ बुधबार १२:८:३७ | किरण थापा

सिन्धुपाल्चोक – किशोरी बेचबिखन गर्ने कार्यमा सघाएको आरोपमा प्रहरीले सिन्धुपाल्चोक पाँचपोखरी थाङ्पाल गाउँपालिका –४ का ३० वर्षीय नितु शेर्पालाई पक्राउ गरेको छ । बेचबिखनका मुख्य आरोपी ३३ वर्षीय तेन्जेन शेर्पा भने फरार भएका छन् ।

रामेछाप जिल्ला स्थायी घर भई सिन्धुपाल्चोकको पाँचपोखरी थाङ्पाल गाँउपालिका – ४ बहिनीको घर बस्दै आएका तेन्जेन शेर्पा र नितुको मिलेमतोमा यही ठाउँकी १६ वर्षीया किशोरीलाई भारतमा लगेर राम्रो जागिर लगाइदिने भन्दै काभ्रेको बनेपा पुर्‍याएका थिए ।

कक्षा ८ पास गरेर ९ कक्षामा पढ्दै गरेकी किशोरीलाई छिमेकी नितु शेर्पाले जेठ १ गते पानी लिन धारामा गएको बेलामा भारतमा लगेर राम्रो जागिर लगाउने भन्दै फकाएको पीडित किशोरीले बताइन् ।

घरपरिवारले थाहा नपाउने गरी पीडित किशोरी र तेन्जेन शेर्पा जेठ ४ गते बिहान ४ बजे त्यहाँबाट हिँडेको पाइएको छ । अभियुक्त शेर्पाले मेलम्ची गएर ओर्लनु म आउँदै गर्छु भनेर किशोरीलाई बसमा चडाएर पठाएको र आफू अर्कै गाडीमा मेलम्चीसम्म आएका थिए । उनीहरु मेलम्चीबाट सँगै बनेपा आएका थिए ।

यसरी खुल्यो रहस्य

बनेपामा सुनगाभा नामको होटल पुगेपछि तेन्जेन शेर्पाले २ वटा कोठा लिएर एउटामा आफू बस्छन् र अर्कोमा किशोरीलाई राख्छन् । इन्डिया गएर राम्रो जागिर खाने र धेरै पैसा कमाउने आशामा घर छाडेकी किशोरीलाई पल्लो कोठामा रहेको तेन्जेनको फोन संवादले झसंग बनाउँछ ।

शेर्पाले फोनमा केटी राम्री छ मलाई त्यति पैसाले हुँदैन भनेको सुनेपछि आफू बेचिन लागेको पीडितले थाहा पाउँछिन् । त्यसपछि पीडित किशोरीले शेर्पाको कोठा बाहिरबाट बन्द गरेर उनी होटल साहुको सहयोगमा आफू बेचिन लागेको कुरा घरमा आफ्ना बुवा सम्म पु¥याउन सफल हुन्छिन् ।

घरपरिवारले खबर गरेपछि केही समयमै प्रहरी होटलमा पुग्छ । प्रहरी पुग्दा होटलको पैसा तिरेर शेर्पा त्याहाँबाट भागिसकेका हुन्छन् । बेचिनबाट बचेर परिवारको शरणमा पुगेपछि पीडितका बुवाले इलाका प्रहरी कार्यालय मेलम्चीमा तेन्जेन शेर्पा र किशोरीलाई फकाउन सहयोग गर्ने उनको बहीनी नितु शेर्पाविरुद्घमा किटानी जाहेरी दिएका छन् ।

पीडितको जाहेरीकै आधारमा फकाउन सहयोग गर्ने नितु शेपालाई मानेखर्क प्रहरी चौकीले मंगलबार बिहान निजकै घरबाट पक्राउ गरेको इलाका प्रहरी कार्यालय मेलम्चीका प्रहरी निरीक्षक महेन्द्र दर्नालले जानकारी दिनुभयो । पक्राउ परेका शेर्पालाई मंगलबार नै जिल्ला प्रहरी कार्यालय चौतारामा पेस गरेको प्रहरी निरीक्षक दर्नालले जानकारी दिनुभयो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण थापा

किरण थापा सिन्धुपाल्चाेकका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्