साउदीमा समस्या परेको छ ? अपनाउनुहोस् यी उपाय

साउन ८, २०७६ बुधबार १९:४५:० | उज्यालो सहकर्मी

काठमाण्डौ – साउदीमा हुनुहुन्छ ? तपाईंलाई कम्पनीबाट समयमा अकामा नवीकरण नगरिदिने, सम्झौता अनुसारको काम र तलब नदिने, करार अविधि सकिएपछि पनि एक्जिट परमिट (घर फर्किने अनुमति) नदिने, विभिन्न कागजातमा भाषाको ज्ञान बिनै सहि गर्न लगाउने लगायतका समस्या भएको छ ? यदि छ भने समयमै कानुनी उपचार खोज्न साउदीस्थित नेपाली दूतावासले अनुरोध गरेको छ ।

काम गरेको तीन महिनाभन्दा बढी अवधिको तलब नदिएमा, तीन महिना नाघ्दा पनि अकामा (परिचयपत्र) नवीकरण नगरिदिएमा, तीन महिनाभन्दा बढी अवधिसम्म काम वा अन्य सेवा सुविधा नदिएमा, अकामा जारी, नवीकरण, पारिश्रमिक, काम साउदी अरब आएको ९० दिनसम्म पनि नदिएमा उजुरी दिन दूतावासको अनुरोध छ ।

यस्तो समस्या परेमा आफू कार्यरत क्षेत्रको श्रम अफिस र श्रम अदालतमा गइ निवेदन दिन र त्यसको जानकारी दूतावासलाई पनि गराउन दूतावासले आग्रह गरेको हो ।

यस्ता समस्या भोगेर दूतावासमा आउने क्रम बढेको, तर समयमा उजुरी नगर्दा समस्या समाधानमा समस्या भएको भन्दै समयमै उजुरी गर्न दूतावासकाे आग्रह छ ।

कस्तो अवस्थामा साउदीमा बस्न हुँदैन ?

लामो अवधि अकामा नवीकरण नगरी साउदीमा बस्न हुँदैन । एक वर्षभन्दा बढी सयम अकामा नवीकरण नभएमा नवीकरण लागत धेरै हुने र कफाला गर्न वा नवीकरण पनि नगर्ने अवस्था हुन्छ ।

त्यस्तो अवस्थामा आफू अवैधानिक हुने हुँदा विभिन्न कानुनी समस्या पर्न सक्छ । त्यसैले अवधि सकिएको तीन महिनाभित्रै श्रम कार्यालयमा दावी गरी तुरून्तै कफाला गर्न वा कम्पनीको अवस्था अनुसार थप कारवाहीमा जानु राम्रो हुन्छ ।

तीन महिनासम्म पनि करार अनुसारको सेवा सुविधा नदिएमा त्यो कम्पनीमा काम गर्नु उपयुक्त हुँदैन । यस्तो अवस्थामा स्पोन्सर (रोजगारदाता)को स्वीकृति नलिइ अर्को स्पोन्सर कम्पनीमा जान सकिन्छ । तर नयाँ स्पोन्सर र कामदारले श्रम कार्यालयको स्वीकृतिमा कफाला गर्नुपर्छ ।

यस्तो समस्या परेमा साउदी श्रम मन्त्रालयको कल सेन्टरको निस्शुल्क फोन नम्बर १९९११ मा सम्पर्क गर्न सकिन्छ ।

साउदीमा यी काम गर्नुहोस्

रोजगारीका लागि होस् या जुनसुकै उदेश्यले जुन देश गए पनि सम्बन्धित देशको कानुन पालना गर्नु अनिवार्य हुन्छ । त्यसैले साउदीमा हुने नेपालीलाई साउदीको कानुन उल्लङ्घन नगर्न दूतावासको अनुरोध छ । कानुनको उल्लङ्घन गर्दा जस्तोसुकै पनि सजाय हुन सक्ने भएकाले सावधान रहन पर्छ ।

जाँडरक्सी खाने, बनाउने, ओसारपसार गर्ने, बिक्री गर्ने, झगडा गर्ने, चोरी गर्ने गर्नु हुँदैन ।

यस्तै,महिलालाई जिस्काउने तथा यौनजन्य व्यवहार, लागुपदार्थ सेवन, ओसारपसार, बिक्रीवितरण,साउदी अरबमा प्रतिबन्धित औषधीको ओसारपसार र सेवन, घूस लिनेदिने काम गर्नु हुँदैन । कुनै पनि कागजमा नबुझिकन सहीछाप गर्नु हुँदैन ।

गैरकानूनी कारोबारमा रकम लेनदेन गरेर, विदेशी नागरिक तथा अपरिचित नेपाली वा परिचितकै लागि जमानत बसेर, अकामाको फोटोकपि अनाधिकृत व्यक्तिलाई दिएर, अनधिकृत म्यासेजहरु पठाएर, आफ्नो खाताबाट अधिक रकम विभिन्न व्यक्तिलाई पठाएर, लाइसेन्स बेगर सवारी चलाइ दुर्घटना वा क्षति भएर, बिना अकामाका कुनै मानिसलाई सवारीमा चढाइ ओसारपसार गरेर, अपरिचितको घरको अगाडि लामो समय विनाकारण उभिएर पनि साउदीमा समस्या पर्न सकिन्छ । त्यसैले यस्तो कुराबाट बच्नु पर्छ ।

आफ्नो बैंक खाता नम्बर र एटीएम पिन नम्बर अरुलाई दिएर, अरुको रकम आफ्नो अकामाबाट पठाएर, एटीएम मेशिन अगाडि लामो समय उभिएर, अनधिकृत क्षेत्रमा प्रवेश गरेर वा अन्य प्रकृतिका गैरकानुनी काम गरेका कारण थुप्रै नेपाली समस्यामा परेको भन्दै दूतावासले यस्तो काम नगर्न अनुरोध गरेको छ ।

कुनै गैरकानुनी कामको आरोपमा प्रहरी र अदालतमा मुद्दा लागेको अवस्थामा आफ्नो प्रमाण लिने र मुद्दाको किनारा लगाउन पहल गर्नु पर्छ । यस्तो मुद्दा नसुल्झाउँदासम्म साउदीबाट निस्कन पाईंदैन । यस्तो समस्या परेमा साउदीस्थित नेपाली दूतावासमा सम्पर्क गरेर सहयोग लिन सकिन्छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्