मेलम्ची खानेपानी आयोजनामा हवाई फायर र अश्रु ग्याँस प्रहार

भदौ १९, २०७६ बिहीबार १७:४:४४ | किरण थापा

सिन्धुपाल्चोक – मेलम्ची खानेपानी आयोजनाको मुहान अम्बाथानमा आयोजनाबाट पीडित स्थानीय मजदुर तथा वितरकहरुले बिहीबार प्रदर्शन गरेका छन् ।

प्रदर्शनकारीको भिडले सेनामाथि नै ढुंगामुढा प्रहार गर्न थालेपछि सेनाले हवाई फायर र अश्रु ग्याँस प्रहार गर्नुपरेको थियो । प्रदर्शनकारीले सेनामाथि नै ढुंगामुढा गर्न थालेपछि ८ राउण्ड हवाई फायर र २ राउण्ड अश्रुग्याँस प्रहार गरिएको सशस्त्रका प्रहरी निरीक्षक मणिराम लामिछानेले बताउनु भयो ।

प्रदर्शनका क्रममा सशस्त्र प्रहरीका २ जवान घाइते भएको र प्रदर्शनकारीतर्फ कसैलाई केही नभएको निरीक्षक लामिछानेले जानकारी दिनुभयो । हवाई पायर र अश्रु ग्याँस प्रहारपछि अहिले अम्बाथानको अवस्था सामान्य रहेको उहाँले बताउनुभयो ।

आयोजना पीडितहरुले आयोजनाको काम रोक्नका लागि अनिश्चित समयका लागि साइट कार्यालय केही दिनदेखि बन्द गर्दै आएका थिए । उनीहरुले बुधबार आयोजनाको साइट कार्यालय मेलम्चीमा शान्तिपूर्ण र्‍यालीसहित कोणसभा गर्दै आयोजनाबाट पाउनुपर्ने रकम भुक्तानी नभएसम्म कुनै पनि निर्माण कम्पनीलाई आयोजनामा काम गर्न नदिने बताएका थिए ।

स्थानीय मजदुर, सहायक निर्माण कम्पनी र वितरकले बाँकी रकम नपाउँदासम्म नयाँ कम्पनी सिनो हाइड्रोलाई काम गर्न नदिने भन्दै उनीहरुले धर्ना पनि दिएका छन् । सरकारले केही समयअघि मात्र चीनको सिनो हाइड्रोलाई बाँकी कामका लागि छनोट गरेको थियो ।

आयोजना पीडितहरुले संघर्ष समिति बनाएर प्रतिवेदन दिइसकेको अवस्थामा पनि सरकारले समाधानको पहल नगरेको भन्दै ७ दिने अल्टिमेटमसहित रकम भुक्तानीका लागि ज्ञापनपत्र समेत बुझाएका छन् ।

सरकारले ‘पीडितहरुको समस्या समाधान गर्छौं’ भन्ने प्रतिबद्धता गरे पनि हालसम्म कार्यान्वयन नभएकाले आन्दोलन गर्नुपरेको समितिका संयोजक विष्णुमणि आचार्यले बताउनु भयो । मजदुर तथा स्थानीय वितरकहरुको माग पूरा नभएसम्म आयोजनाको कुनै पनि काम गर्न नदिने उहाँको भनाइ छ ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण थापा

किरण थापा सिन्धुपाल्चाेकका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्