पाकिस्तानमा आज कडा सुरक्षाबीच संसदीय चुनाव हुँदै

साउन ९, २०७५ बुधबार १३:९:५१ | एजेन्सी

पाकिस्तानमा आज बिहानदेखि संसदीय निर्वाचनको लागि कडा सुरक्षाबीच मतदान हुँदैछ । राष्ट्रिय सभा, संसदको तल्लो सदन र चारवटा प्रान्तीय विधान सभाको लागि आजको निर्वाचन हुन लागेको हो ।

आगामी पाँच बर्षको लागि नयाँ सरकारको चयन गर्न सर्वसाधारण बुधबार बिहान सबेरैदेखि मतदान स्थलमा पुगेका छन् ।

यस निर्वाचनपछि देशमा आर्थिक उत्थान र राजनीतिक स्थायित्वको आशा सर्वसाधारणले गरेका छन् । मतदान स्थानीय समयानुसार बिहान ८ बजेदेखि सुरु भएको र साँझ ६ बजेसम्म जारी रहने छ ।

यहाँको प्रतिनिधि सभा अर्थात संसदको तल्लो सदन ३४२ सदस्यीय रहेको छ जसमा २७२ स्थान प्रत्यक्ष निर्वाचित, ६० स्थान महिला आरक्षित र १० स्थान धार्मिक अल्पसंख्यकका लागि छुट्याइएको छ । प्रतिनिधि सभाको लागि ३ हजार ४५९ जना उम्मेदवार रहेका छन् ।

यसैगरी खैबर पाख्तुनख्वा, पञ्जाव, बलुचिस्तान र सिन्ध प्रान्तको प्रान्तीय सभाको लागि ५७७ सिट रहेको र ८ हजार ३९६ उम्मेदवार रहेका छन् ।

यस निर्वाचनमा करिब १० करोड ६० लाख मतदाताले आफ्नो नाम निर्वाचन आयोगमा दर्ता गराएका छन् । यसमा करिब ६ करोड पुरुष रहेका छन् ।

जनसङ्ख्याका हिसाबले दक्षिण एसियाको दोस्रो ठूलो देशका रुपमा रहेको पाकिस्तानको यस पटकको संसदको चुनाव निकै चर्चित रहेको छ ।

यस निर्वाचनको पूर्व सन्ध्यामा यहाँको सत्तारुढ दल नेशनल मुस्लिम लिगका नेता एवं पूर्व प्रधानमन्त्री नवाज शरिफलाई भ्रष्टाचारको अभियोगमा जेल सजाय सुनाइएको छ ।

निर्वाचनको मुखैमा आएर उहाँलाई दश वर्षको जेल सजाय सुनाइएपछि यहाँको निर्वाचनमा प्रजातान्त्रिक दलहरुको सहभागिता र स्वस्थ एवं निस्पक्ष निर्वाचनका विषयमा आशङ्का पनि उत्पन्न भएको छ ।

पाकिस्तानको सत्तामा समेत पकड रहेको शक्तिशाली सेनाले यस निर्वाचनमा के कस्तो भूमिका निर्वाह गर्ला अथवा सेनाले नै आफू अनुकूलको परिणामका लागि चुनावमा हस्तक्षेप गर्ने हो कि भन्ने पनि यहाँ व्यापक रुपमा चर्चा भएको थियो ।

तर सेनाले चुनावमा आफ्नो कुनै भूमिका नरहने स्पष्ट गरिसकेको छ । यसबाट पनि आशङ्का नमेटिएको यहाँका राजनीतिक जानकारहरु बताउँछन् ।

त्यसैगरी आतङ्ककारी गतिविधिबाट प्रताडित पाकिस्तानमा अहिले पनि चुनावलाई केन्द्रित गरेर हिंसाका घटना भएका छन् ।

यस्तो हिंसामा परी १५० जना भन्दा बढीको ज्यान गइसकेको छ । छिटपुट हिंसाका घटना जारी नै छन् । त्यसैले पनि आजको मतदानका लागि सेनाको अगुवाइमा कडा सुरक्षा व्यवस्था अपनाइएको छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्