लकडाउन खुकुलो पारेपछिका दुई महिनामा २० हजारभन्दा धेरैमा कोरोना सङ्क्रमण

साउन ३०, २०७७ शुक्रबार ११:४:५८ | उज्यालो सहकर्मी

काठमाण्डौ - सरकारले लकडाउन खुकुलो पारेपछिको दुई महिनामा नेपालमा २० हजारभन्दा धेरै कोरोना सङ्क्रमित थपिएको पाइएको छ ।

सरकारले आर्थिक क्रियाकलाप सञ्चालन गर्नको लागि जेठ २९ गतेदेखि लकडाउन खुकुलो बनाएको थियो । लकडाउनको खुकुलो हुनु अघिल्लो दिन जेठ २८ गते ४ हजार ३ सय ६४ जना कोरोनाका सङ्क्रमित थिए ।

लकडाउन खुकुलो भएकै दिन जेठ २९ गते २ सय ५० जना सङ्क्रमित थपिएपछि ४ हजार ६ सय १४ पुगेको थियो । त्यसयता दुई महिनामा २० हजार ३ सय ४३ जनामा कोरोना सङ्क्रमण पुष्टि भएको हो । पछिल्लो विवरणअनुसार नेपालमा २४ हजार ९ सय ५७ जनामा कोरोना सङ्क्रमण पुष्टि भएको छ ।

फोटो स्रोत : स्वास्थ्य मन्त्रालय

लकडाउन खुकुलो भएपछि कोरोनाको सङ्क्रमण र जोखिम थप बढ्दै गएको तथ्याङ्कले देखाएको छ । लकडाउन खुकुलो पारेपछिको दुई महिना बित्दा कोरोनाको जोखिम र सङ्क्रमण रोकथाम हुनुको सट्टा बढ्दो छ । जेठको ३२ गते ५ हजार ७ सय ६० जना कोरोनाबाट सङ्क्रमित भएकोमा असार १ गते ४ सय ५१ जना थप भएपछि सङ्क्रमितको संख्या ६ हजार २ सय ११ पुगेको थियो । असार महिनाका ३० दिनमा झण्डै ११ हजारमा सङ्क्रमण पुष्टि भएको थियो ।

असारको ३१ गते १७ हजार १ सय ७७ जना सङ्क्रमित पुगेकोमा साउन १ गते १ सय ६७ जना थपिएसँगै १७ हजार ३ सय ४४ पुगेको थियो । साउनको पहिलो हप्ता सङ्क्रमितको संख्या १८ हजार नाघ्यो । सरकारले साउन ६ गते राति लकडाउन हटाउनुअघि १७ हजार ९ सय ९४ जनामा कोरोना सङ्क्रमण पुष्टि भएको थियो । त्यसपछि साउन १५ गतेसम्म सङ्क्रमितको संख्या १९ हजार ५ सय ४७ पुग्यो । त्यसपछिका हिजोसम्म ५ हजार ४ सय १० जना थपिएका छन् ।

स्वास्थ्य मन्त्रालयको पछिल्लो तथ्याङ्कअनुसार साउनका २९ दिनमा मात्रै ७ हजार ७ सय ८० जना नयाँ सङ्क्रमित थपिएका छन् । अहिलेसम्म सङ्क्रमितमध्ये १६ हजार ८ सय ३७ जना निको भएका छन् । निको हुनेको दर ६७ दशमलव ५ प्रतिशत रहेको छ ।

सरकारले गएको चैत ११ गतेदेखि लकडाउन गरेको थियो । झण्डै चार महिनापछि सरकारले साउन ६ गते रातिदेखि लकडाउन हटाएको थियो । लकडाउनको अन्त्य हुँदा परीक्षण गरिएकामध्ये ४ दशमलव २२ प्रतिशत पोजेटिभ देखिएको थियो । हिजो ५ दशमलव ३३ प्रतिशत पोजेटिभ देखिएका छन् ।

काठमाण्डौसहित पर्सा, रौतहट र महोत्तरी, मोरङ, बाँकेलगायतका जिल्लामा सङ्क्रमण बढ्दै गएको छ । काठमाण्डौ उपत्यकाका तीन जिल्लाका सङ्क्रमितमध्ये झण्डै ९० प्रतिशत काठमाण्डौका रहेका छन् । काठमाण्डौ, पर्सा, रौतहट र महोत्तरी ५ सयभन्दा धेरै सक्रिय सङ्क्रमित भएका जिल्लाको सूचीमा छन् ।

स्वास्थ्य मापदण्ड नअपनाउँदा सङ्क्रमण र जोखिम बढेको स्वास्थ्य तथा जनसङ्ख्या मन्त्रालयका प्रवक्ता डाक्टर जागेश्वर गौतमले बताउनुभयो । मास्क लगाउने र दुई मिटर दूरी कायम गर्ने हो भने पनि सङ्क्रमण फैलनबाट रोक्न सकिने उहाँको भनाइ छ । सङ्क्रमण बढेका जिल्ला र पालिकाले सिल गर्नेदेखि निषेधाज्ञा गर्दै आएका छन् ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्