मकवानपुरमा निषेधाज्ञा भोलिदेखि हट्ने, बिहान १० बजेसम्म बजार खुल्ने

भदौ १५, २०७७ सोमबार १८:१:२५ | हरि हुमागाईं

मकवानुपर – मकवानपुरका चार वटा पालिकामा लगाइएको निषेधाज्ञा मङ्गलबारदेखि हटाइने भएको छ । बजार क्षेत्रमा बन्द गर्ने स्वरुप पनि परिवर्तन गरिने भएको छ ।

मकवानपुरको हेटौँडा उपमहानगरपालिकाभरि र मनहरी गाउँपालिकाको राजमार्ग क्षेत्रमा साउन २६ गतेदेखि जारी निषेधाज्ञा मङ्गलबारदेखि हट्ने मकवानपुरका प्रमुख जिल्ला अधिकारी दीपकराज नेपालले बताउनुभयो ।

सोमबार बिहान बसेको कमान्ड पोस्टको बैठकले निषेधाज्ञा हटाएर दिउँसोको समयमा बजार र यातायात भने बन्द राख्ने निर्णय भएको उहाँले बताउनुभयो । यही निर्णयपछि मकवानपुरको थाहा नगरपालिका र भीमफेदी गाउँपालिकामा लगाइएको निषेधाज्ञा पनि हटाइने उहाँले बताउनुभयो । निषेधाज्ञा हटेसँगै हेटौँडाका चोक चोकमा परिचालन गरिएका नेपाली सेना ब्यारेकमा फर्कने छन् ।

अहिलेको स्वरुपलाई मङ्गलबारदेखि भने केही सहज बनाइने प्रजिअ नेपालले बताउनुभयो । बिहान १० बजेसम्मका लागि सबै प्रकारका व्यवसाय सञ्चालन गर्न दिइने र यातायात भने बन्द नै गरिने भएको छ । दिउँसो केही घण्टा बैँक तथा कार्यालय खोल्नका लागि सहज बनाइएको उहाँले बताउनुभयो ।

बैठकले निषेधाज्ञा हटाउने निर्णय गरेको भए पनि बजार सञ्चालन भने बिहान १० बजेसम्म मात्र गर्न दिने निर्णय गरेको छ । यो निर्णय भदौ २५ सम्म लागू हुनेछ ।

बिहान बजार सञ्चालन भए पनि सवारी साधनमा भने रोक लगाइएको छ । दिउँसो १० बजेदेखि टिप्पर सञ्चालन गर्न पाइनेछ भने भारी सवारी साधनहरु साँझ ७ बजेपछि मात्र सञ्चालन हुनेछन् । उद्योगको हकमा भने मजदुरलाई क्वरेण्टीनको व्यवस्था गरेर मात्र सञ्चालन गर्न पाइनेछ ।

मकवानपुरमा अर्को आदेश नभएसम्मका लागि विभिन्न सभा, समारोह, गोष्ठी, धार्मिक पर्वको नाममा भेला गर्न नपाइने र एक जिल्लाबाट अर्को जिल्ला जान निषेध गरिएको छ । मकवानपुरमा खाद्यान्नलगायत विभिन्न सामग्री लोड तथा अनलोड गर्न बेलुका ७ बजेदेखि बिहान ५ बजेसम्म समय निर्धारण गरिएको छ ।

बैठकले सर्वसाधारणका लागि खाद्यान्न, इन्धन, तरकारी, दुग्धजन्य र औषधिजन्य लगायतका अति आवश्यक वस्तु खरिद गर्न बिहान ५ बजेदेखि १० बजेसम्मको समय तोकिएको छ ।

त्यसैगरी बैठकले जिल्लाभरका वित्तीय संस्था, बैंक मङ्गलबारदेखि दिनैभरि सञ्चालन गर्न दिनुको साथै उक्त प्रयोजनका लागि जाने सर्वसाधारणलाई निजी सवारी साधनमात्र प्रयोग गर्न दिने निर्णय गरेको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हरि हुमागाईं

मकवानपुरका उज्यालो सहकर्मी हरि हुमागाईं नेपाल पत्रकार महासंघको पूर्व जिल्ला अध्यक्षसमेत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्