जब कालिज फार्मभित्र चितुवा पस्यो...

भदौ २६, २०७७ शुक्रबार १३:११:३२ | प्रताप बानियाँ

म्याग्दी – म्याग्दीको बेनी नगरपालिका ४, सिङ्गामा हरियाली ग्रुपले सुरु गरेको व्यावसायिक कालिज फार्ममा चितुवा पसेको छ । चार सय ५० वटा कालिज पालिएको फार्मभित्र बिहीबार राति चितुवा पसेको हरियाली ग्रुप प्रालीले जनाएको छ ।

फार्मभित्र पसेको चितुवाले कालिज मारेर खाएको भए पनि कति सङ्ख्यामा कालिज मारेको भन्ने यकिन नभएको ग्रुपका प्रबन्ध निर्देशक शेरबहादुर केसीले जानकारी दिनुभयो । अहिले कालिजको फार्मभित्र पसेको चितुवा नियन्त्रणको प्रयास गरिए पनि खुला ठाउँ भएका कारण नियन्त्रणमा समस्या भइरहेको छ ।

चितुवा नियन्त्रणका लागि डिभिजन वन कार्यालय म्याग्दीबाट दुई जना कर्मचारी र तातोपानी प्रहरी चौकीबाट प्रहरीको टोली घटनास्थल पुगेका छन् । डिभिजन वन कार्यालयका निमित्त प्रमुख सन्तोष खनालले कार्यालयसँग रहेको फलामे खोरको सहायताले चितुवा नियन्त्रणको प्रयास गरिए पनि फार्मको क्षेत्र ठूलो र खुला ठाउँ भएकाले समस्या भएको बताउनुभयो । फार्मभित्र पसेको चितुवाको वरिपरि धेरै भिड नगर्न आग्रह गरिएको छ ।

चितुवा नियन्त्रण गर्न प्रदेश वन निर्देशनालय पोखरामा जानकारी गराएपछि त्यहाँबाट नियन्त्रणको टोली झिकाउन चितवन राष्ट्रिय निकुञ्जमा आग्रह गरिएको निमित्त प्रमुख खनालले जानकारी दिनुभयो । खबरलगत्तै राष्ट्रिय निकुञ्जको चितुवा नियन्त्रणको डार्टिङ टिम (प्राविधिक टोली) म्याग्दीतर्फ लागेको उहाँले बताउनुभयो । डार्टिङ टिम आएपछि मात्रै चितुवालाई बन्दुकको सहायतामा सिरिन्ज प्रहार गरी लठ्याउन सकिने र त्यसपछि नियन्त्रणमा लिइ सामुदायिक वन क्षेत्रमा लगेर छाडिने निमित्त प्रमुख खनालको भनाइ छ ।

कुखुरा वा बाख्राको खोरभित्र पसेको भए चितुवालाई सजिलै नियन्त्रणमा लिन सकिने भए पनि खुला ठाउँमा रहेको कालिज फार्मभित्र पसेको हुँदा समस्या भएको बताइएको छ । बिहान कालिजलाई दानापानी दिने क्रममा प्रालीका कर्मचारी फार्मभित्र पस्दा वयस्क चितुवाले झम्टिन खोजेपछि फार्मभित्र चितुवा पसेको थाहा भएको हो । आहाराको खोजीमा चितुवा जाली नाघेर कालिजको फार्मभित्र पसेको हुन सक्ने अनुमान गरिएको छ ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्