कांग्रेस सरकारमा गए धर्मकाे विषयमा जनमत सङ्ग्रह गराउँछ : शशाङ्क काेइराला

फागुन ४, २०७७ मंगलबार १९:३:२६ | हेमराज शर्मा

दाङ – नेपाली कांग्रेसका महामन्त्री डाक्टर शशाङ्क कोइरालाले अहिलेको परिस्थितिमा आउँदाे वैशाखमा चुनाव हुन नसक्ने बताउनुभएको छ । नेपाल प्रेस युनियन दाङले मङ्गलवार घोराहीमा आयोजना गरेको पत्रकार सम्मेलनमा बोल्दै उहाँले वैशाखमा चुनाव हुनै नसक्ने दाबी गर्नुभयो । अब वैशाखमा चुनाव हुन नसक्ने हुँदा पार्टीको प्राथमिकता महाधिवेशनमा हुनुपर्ने कोइरालाको भनाइ छ ।

पार्टीलाई एकताबद्धसँगै आउँदाे चुनावमा देशको प्रमुख पार्टी बनाउनका लागि जतिसक्यो चाँडै महाधिवेशन गरेर नेतृत्व परिवर्तन गर्न आवश्यक रहेको नेता काेइरालाले बताउनुभयो । ‘केपी ओली सरकारले वैशाखमा चुनाव गराउन सक्दैन, चुनाव मङ्सिर–पुस महिनातिर मात्र सम्भव छ’, महामन्त्री कोइरालाले भन्नुभयो, ‘त्यसैले कांग्रेस नहुने चुनावकाे पछि लाग्नु हुँदैन बरु पार्टीको महाधिवेशनमा ध्यान दिऔँ ।’ उहाँले जति सक्यो चाँडै पार्टीको क्रियाशील सदस्यता टुङ्गाे लगाएर महाधिवेशनमा जुट्नुपर्ने बताउनुभयो ।

नेपाली कांग्रेस चुनावबाट भाग्न नसक्ने भन्दै महामन्त्री कोइरालाले चुनाव हुने अवस्था आएमा सहभागी हुने बताउनुभयो । ‘अहिले चुनाव हुने अवस्था नै छैन । प्रधानमन्त्री ओलीले चुनाव गराउन चाहेकै छैनन्’, उहाँले भन्नुभयो, ‘अहिले चुनावकाे कुरा गरेर ओलीले अलमल्याउने काम गरिरहेका छन् । अहिलेको आवश्यकता प्रतिनिधि सभा पुनर्स्थापना हो ।’ उहाँले अहिलेको आवश्यकता प्रतिनिधि सभा पुनर्स्थापना भएको भन्दै अदालतको निर्णयलाई आफूहरूले स्वीकार गर्ने बताउनुभयो ।

धर्मको विषयमा जनमत सङ्ग्रह हुनुपर्ने भन्दै महामन्त्री कोइरालाले कांग्रेस सरकारका गएमा यो मुद्दालाई लिएर जनमत सङ्ग्रह गराउनेसमेत बताउनुभयो । ‘धर्म निरपेक्ष र सापेक्ष नभइ स्वतन्त्र हुन्छ । संविधानमा धर्मलाई निरपेक्ष भनेर उल्लेख गरिनु कमजोरी हो । यो विषयलाई जनतामाझ लिएर जानुपर्दछ’, महामन्त्री कोइरालाले भन्नुभयो, ‘कांग्रेसको सरकार भएमा हामी यो मुद्दालाई उठाउँछौँ ।’

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्