राप्रपाले ‘गल्ती गर्दा’ एमाले, कांग्रेस र माओवादीले ठूलाे पार्टी हुने माैका पाए : लिङ्देन

पुष १५, २०७८ बिहीबार १६:२४:५४ | उज्यालो सहकर्मी

काठमाण्डाै – राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले एमाले, कांग्रेस र माओवादी पार्टी जनताका अगाडि मुख देखाउन लायक नभएको टिप्पणी गर्नुभएको छ ।

आज बिहीवार राष्ट्रिय प्रजातन्त्र पार्टी दोलखा जिल्ला कमिटीले काठमाण्डाैमा आयोजना गरेको नवनिर्वाचित अध्यक्षलाई बधाई तथा शुभकामना कार्यक्रममा बोल्दै उहाँले एमाले, कांग्रेस र नेकपा (माओवादी केन्द्र) राजनीतिक र नैतिक रूपमा जनताको अगाडि मुख देखाउन लायक नभएको बताउनुभएको हो ।

राप्रपाले विगतमा गल्ती गर्दा ती पार्टीहरू आकारको हिसाबले ठूलो भएको उहाँले बताउनुभयो । अध्यक्ष लिङ्देनले जनताले देश र धर्मलाई शिरमा बोकेर हिँड्ने राप्रपा पार्टी नै खोजेको भन्दै पार्टी नेतृत्वले कुनै किसिमको कमजोरी नगर्ने बताउनुभयो ।

उहाँले भन्नुभयो – ‘अहिले राजनीतिक रूपले र नैतिक रूपले कांग्रेस, एमाले, माओवादीहरू जो आफूलाई यो देशको ठूलो पार्टी भन्छन्, उनीहरू जनताको बीचमा गएर मुख देखाउन लायक छैनन् । उनीहरूसँग कुनै आधार नै छैन । खाली हिजो कुनै कालखण्डमा हामीले ठिक ढङ्गले जनतालाई बुझाउन नसक्दा उनीहरूले ठूलो पार्टी हुने मौका पाए । यस्तो बेला देशलाई शिरमा बोकेर, धर्मलाई शिरमा बोकेर हिँड्ने राष्ट्रिय प्रजातन्त्र पार्टी जनताले खोजिराखेको पार्टीको रूपमा छ ।’

अध्यक्ष लिङ्देनले विगतमा विभिन्न कारणले राप्रपा छोडेका र अन्य पार्टीमा भएर पनि राप्रपाको विचार मन पराउनेहरूलाई राप्रपामा आउन आह्वान गर्नुभयो । राप्रपामा आउने सबैलाई योग्यता, क्षमताअनुसारको उचित सम्मान र अवसर प्रदान गर्ने उहाँको आश्वासन थियो । विगतमा भएका मानिसहरू मात्रै बसेर पार्टी नचल्ने भन्दै अध्यक्ष लिङ्देनले अन्य पार्टीबाट मान्छे ल्याएर जिम्मेवारी दिन नसके पार्टी ठूलो नहुने उल्लेख गर्नुभयो ।

अन्तिम अपडेट: पुस २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्