एमसीसीमा बहुमत जुटाउन प्रधानमन्त्रीको दौडधुप : दलहरु आ-आफ्नै अडानमा

फागुन ११, २०७८ बुधबार १०:४६:२८ | उज्यालो सहकर्मी

काठमाण्डाै – प्रतिनिधिसभामा टेबल भएको एमसीसी सम्झौतामा बहुमत जुटाउन प्रधानमन्त्री शेरबहादुर देउवाले दाैडधुप तीव्र पार्नुभएको छ । उहाँले सत्ता साझेदार दलहरुसँगै प्रमुख प्रतिपक्षी एमालेलाई समेत सहमतिमा ल्याउने पहल गरिरहनुभएको छ ।

प्रधानमन्त्री देउवाले मंगलबार एमाले अध्यक्ष केपी शर्मा ओलीसँग छलफल गर्नुभएको थियो । बुधबार बिहानैदेखि सत्ता साझेदार दलका शीर्ष नेताहरुसँग परामर्श थाल्नुभएको छ । भोलि बिहीबार दिउँसो १ बजे संसद बैठक बस्ने भएकाले त्यसअघि नै सहमति खोज्ने प्रधानमन्त्री देउवाले प्रयास गर्नुभएको छ । तर दलहरुको अडान फेरिएको छैन ।

सत्तारूढ नेपाली कांग्रेस पहिलेदेखि नै एमसीसी संसद्बाट पारित गर्ने पक्षमा उभिँदै आएको छ । प्रमुख प्रतिपक्षी एमालेले एमसीसी पारित गर्ने विषयमा कुनै प्रतिबद्धता जनाएको छैन । आफैले सरकारको नेतृत्व गर्दा दर्ता गरिएको प्रस्ताव पारित गर्नमा सहयोग गर्न देउवाले आग्रह गर्दै आउनुभएको छ । तर एमालेले आफूहरुको माग पूरा नभएकाले संसदमा बिरोध कायमै रहेको र यस्तो अवस्थामा सहयोग गर्न नसक्ने अडान दोहोर्याएको छ । मंगलबार प्रधानमन्त्री देउवासँग भएको छलफलमा पनि एमालेले यही कुरा गरेको छ । सभामुखले १४ सांसदमाथि कारबाहीको सूचना टाँस नगरेको भन्दै एमालेले निरन्तर संसद बैठक अवरोध गर्दै आएको छ ।

सत्ता साझेदार माओवादी र एकीकृत समाजवादीले एमसीसीको पक्षमा मतदान नगर्ने निर्णय गरिसकेका छन् । यसअघि दुवै पार्टीले एमसीसीलाई संसदमा टेबल हुन नदिने निर्णय गरेका थिए । तर सत्ता गठबन्धन भत्किने डरले संसदमा एमसीसी टेबल गर्न सहमति जनाएपछि दुवै पार्टीभित्र विवाद बढेको छ । माओवादी अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालले एमसीसी टेबल भए पनि यसको पक्षमा मतदान नगर्ने बताएका छन् । तर विपक्षमा मतदान गरेमा सरकार छाड्नुपर्ने कांग्रेस नेताहरुको चेतावनी छ । कांग्रेस महामन्त्री गगनकुमार थापाले सरकारले प्रस्ताव गरेको विषयका विरोधमा हुनेहरूले सरकारमा बस्न नसुहाउने बताउनुभएको छ । गठबन्धनमा पनि बस्ने, सरकारमा पनि रहने तर सरकारको प्रस्तावको विरोध पनि गर्ने भए सरकार छोड्दा नै राम्रो हुने उहाँको भनाइ छ । विपक्षमा मतदान गर्दा सरकार नै छोड्नुपर्ने भएकाले माओवादी केन्द्र र एकीकृत समाजवादी पछिल्लो निर्णयमा अडिक रहिरहन सक्छन् कि सक्दैनन् भन्ने प्रश्न उठेको छ ।

पाँँच दलीय गठबन्धनमा रहेको जनता समाजवादी पार्टी जसपाको एमसीसबारे आधिकारिक धारणा आउन सकेको छैन । जसपा संघीय परिषद्का अध्यक्ष डा. बाबुराम भट्टराई एमसीसी पारित गर्नुपर्ने पक्षमा हुनुहुन्छ भने अध्यक्ष उपेन्द्र यादव पारित गर्न नहुने पक्षमा उभिँदै आउनुभएको छ । राष्ट्रिय जनमोर्चा पहिलेदेखि नै एमसीसी सम्झौता खारेजको माग गर्र्दै सडक आन्दोलन गर्दै आएको छ ।

भोलिको बैठकमा के होला ?

आइतबार एमसीसी सम्झौता टेबल भएपछि प्रतिनिधिसभाको बैठक भोलि बिहीबार दिउँसो १ बजेका लागि बोलाइएको छ । भोलिको बैठकको कार्यसूची सार्वजनिक भैसकेको छैन । संसद बैठकअघि कार्यव्यवस्था परामर्श समितिको बैठक बस्नेछ । बैठकले एमसीसी सम्झौता अनुमोदन प्रक्रिया तय गर्नेछ ।

संसद बैठकमा एमसीसीमाथि सैद्धान्तिक छलफल गर्ने तयारी छ । सैद्धान्तिक छलफलमा सांसदहरूले एमसीसीको पक्ष र विपक्षमा आआफ्नो धारणा राख्नेछन् । छलफलमा उठेका प्रश्नहरूको मन्त्रीले जवाफ दिएपछि एमसीसी सम्झौता अनुमोदनको प्रक्रियामा जानेछ । ध्वनि मत प्रक्रियाबाट निर्णयार्थ प्रस्तुत हुँदा एमालेले यसअघिजस्तै विरोध गरिरहेमा मतदानमा सहभागी भएको मानिँदैन ।

हाल संसदमा कायम रहेका २ सय ७१ सांसदमध्ये नेकपा एमालेका ९७, नेपाली कांग्रेसका ६३, नेकपा माओवादी केन्द्रका ४८, नेकपा एकीकृत समाजवादीका २४, जनता समाजवादी पार्टीका २१, लोकतान्त्रिक समाजवादी पार्टीका १२ सांसद छन् । त्यस्तै, नेमकिपा, राप्रपा र राष्ट्रिय जनमोर्चाका एक/एक र एक जना स्वतन्त्र सांसद छन् ।

माओवादी केन्द्र र एकीकृत समाजवादीले बैठक बहिष्कार गरेको तथा एमालेको नाराबाजी चालू रहेको अवस्थामा सभामुखले निर्णयार्थ पेस गरेर ध्वनि मतबाट पारित भएको घोषणा हुन सक्छ ।
सत्ता गठबन्धनमा रहेका माओवादीका, एकीकृत समाजवादी, जनमोर्चासँगै नेमकिपा, राप्रपा अहिलेसम्म एमसीसीको विपक्षमा छन् । १२ सांसद भएको लोकतान्त्रिक समाजवादी पार्टी लोसपाले सम्झौताको पक्षमा मत दिएमा कांग्रेसको ६१ सहित प्रस्तावको पक्षमा ७३ मत पुग्नेछ । २१ सांसद भएको जसपामा दुईथरी मत छ ।

गठबन्धनमा रहेका माओवादी, एकीकृत समाजवादी, जनमोर्चासहित नेमकिपा, राप्रपा र स्वतन्त्र गरी ७६ जना विपक्षमा उभिएमा सम्झौता अनुमोदन प्रक्रिया असफल हुन सक्छ । त्यसैले सकभर गठबन्धनलाई मनाउन र नभएमा एमालेलाई साथ लिएर एमसीसी सम्झौतामा बहुमत जुटाउन प्रधानमन्त्री लाग्नुभएको हो । तर उहाँको अहिलेसम्मको भेटवार्ता र पहलबाट एमसीसीको पक्षमा बहुमत पुग्ने सम्भावना देखिएको छैन ।

एमालेले विपक्षमा मत नदिएर नाराबाजी मात्रै गरेमा तथा माओवादी केन्द्र र एकीकृत समाजवादीले बहिष्कार गरेको अवस्थामा एमसीसी पारित हुन्छ । प्रतिनिधिसभा बैठकमा कम्तिमा ६९ जना सांसद उपस्थित भए भने ३५ जनाले पक्षमा मतदान गर्दा सम्झौता अनुमोदन हुनेछ ।

अन्तिम अपडेट: पुस २६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्