अमेरिका भ्रमणको एजेन्डा जानकारी गराउन प्रधानमन्त्रीलाई संसदीय समितिको निर्देशन

असार ५, २०७९ आइतबार १४:४६:४५ | उज्यालो सहकर्मी

काठमाण्डाै – प्रतिनिधि सभाअन्तर्गतको अन्तर्राष्ट्रिय सम्बन्ध समितिले प्रधानमन्त्री शेरबहादुर देउवालाई आसन्न अमेरिका भ्रमणको एजेन्डाबारे जानकारी गराउन निर्देशन दिएको छ ।

आज आइतवार सिंहदरबारमा बसेको समितिको बैठकले भ्रमणको मिति तय भएपछि एजेन्डाबारे जानकारी गराउन निर्देशन दिएको हो । समितिले आजको बैठकमा प्रधानमन्त्री देउवालाई पनि छलफलका लागि बोलाएको थियो । तर, उहाँ बैठकमा अनुपस्थित हुनुभयो ।

बैठकमा प्रधानमन्त्री अनुपस्थित भएकोमा ध्यानाकर्षण भएको समितिका सभापति पवित्रादेवी निरौलाले बताउनुभयो । उहाँले बैठकमा प्रधानमन्त्री देउवा नआएर संसदीय समितिलाई अपमान गरेको बताउनुभयो ।

आजको बैठकमा प्रधानमन्त्री देउवाको अनुपस्थितिलाई लिएर विवादसमेत भएको छ । प्रमुख विपक्षी दल नेकपा एमाले र सत्तापक्षकै माओवादी सांसदले प्रधानमन्त्री देउवाको आलोचना गरेपछि कांग्रेसका सांसदले भने बचाउ गरे ।

नेकपा एमालेका नेता भीम रावलले प्रतिनिधि सभाको अन्तर्राष्ट्रिय सम्बन्ध समितिमा प्रधानमन्त्री शेरबहादुर देउवाको अनुपस्थिति ‘खेदजनक’ भएको बताउनुभएको छ । एसपीपीबारे प्रधानमन्त्री देउवाको जवाफ माग गरिएको तर, जवाफ दिन प्रधानमन्त्री अनुपस्थित हुनुले आशङ्का उब्जाएको उहाँको टिप्पणी छ । नेपाली कांग्रेसकी सचेतक पुष्पा भुसालले प्रधानमन्त्री देउवाको बचाउ गर्नुभएको छ । उहाँले देउवाको अनुपस्थितिलाई संसदीय समितिको अपमान भन्न नमिल्ने बताउनुभयो । भुसालले समितिले बोलाउँदा अनुपस्थित भएको विषयलाई समितिकै अपमानका रूपमा नलिन आग्रहसमेत गर्नुभएको छ ।

रक्षामन्त्रीसमेत रहनुभएका प्रधानमन्त्री देउवालाई अमेरिकासँगको स्टेट पार्टनरशिप प्रोग्राम (एसपीपी), परराष्ट्र नीति कार्यान्वयन, अमेरिका भ्रमणबारे जानकारी दिन बोलाइएको थियो । गएको शुक्रवार समितिले नेपाली सेना र रक्षा मन्त्रालयलाई एसपीपीसम्बन्धी सम्पूर्ण कागजात बुझाउन निर्देशन दिएको थियो । अब ती कागजात आएपछि प्रधानमन्त्रीसहित पुनः छलफलमा बस्ने सभापति निरौलाले जानकारी दिनुभयो । अस्तिको बैठकमा परराष्ट्र मन्त्री डा. नारायण खड्का र प्रधानसेनापति प्रभुराम शर्माले एसपीपी नेपालको हितमा नरहेको भन्दै सम्झौता नगर्ने बताउनुभएको थियो ।

अन्तिम अपडेट: पुस २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

अमेरिका भ्रमणको एजेन्डा जानकारी गराउन प्रधानमन्त्रीलाई संसदीय समितिको निर्देशन

फाइल फाेटाे

तपाईको प्रतिक्रिया