भूकम्प प्रभावितले असारभित्र पहिलो किस्ता नलिए लाभग्राही सूचीबाट हटाइने

 असार ३, २०७६ मंगलबार ७:५१:११ | रासस
unn.prixa.net

काठमाण्डौ – राष्ट्रिय पुनर्निर्माण प्राधिकरणले अहिलेसम्म अनुदान सम्झौता नगरेका लाभग्राहीलाई यही असार २१ गतेभित्र अनुदान सम्झौता गरी असार मसान्तभित्र अनुदानको पहिलो किस्ता रकम लिन अनुरोध गरेको छ ।

तोकिएको समयसीमाभित्र अनुदान सम्झौता गरी पहिलो किस्ता नलिए लाभग्राही सूचीबाट हटाइने प्राधिकरणका सहप्रवक्ता मनोहर घिमिरेले जानकारी दिनुभयो । निजी आवास अनुदानका ६० हजारभन्दा बढी भूकम्प प्रभावित लाभग्राही सूचीमा सूचीकृत भए पनि अनुदान सम्झौता गर्न आएका छैनन् ।  

सोमबार अपराह्नसम्मको तथ्याङ्कअनुसार आठ लाख २६ हजार ३३३ लाभग्राहीमध्ये सात लाख ६६ हजार ३१७ ले मात्र अनुदान सम्झौता गरेका छन् । भूकम्प प्रभावित लाभग्राहीले अनुदान सम्झौता गर्न आ–आफ्नो वडा कार्यालयहरूमा सम्पर्क राख्नुपर्छ । अनुदान सम्झौता गरेर पनि पहिलो किस्ता नलिने लाभग्राहीलाई असार मसान्तभित्र पहिलो किस्ताको अनुदान रु ५० हजार लिइसक्न पनि प्राधिकरणले आग्रह गरेको छ ।

अनुदान सम्झौता गरेका सात लाख ६६ हजार ३१७ मध्ये आजसम्म सात लाख ६१ हजार ५४२ ले पहिलो किस्ता लिएका छन् । असार मसान्तभित्र पहिलो किस्ता नलिए त्यस्ता लाभग्राहीको नाम सूचीबाट हटाइने सहप्रवक्ता घिमिरेले बताउनुभयो ।

प्राधिकरणको मापदण्डअनुसार घरको जग हालेपछि लाभग्राहीले दोस्रो किस्ताको एक लाख ५० हजार रुपैयाँका लागि निवदेन दिन सक्छन् । लाभग्राहीलाई अनुदान सम्झौता गर्न तथा पहिलो किस्ता लिन स्थानीय तहले सहयोग गर्ने प्राधिकरणले जनाएको छ । 
 

अन्तिम अपडेट: कात्तिक २६, २०७६

तपाईको प्रतिक्रिया