जुम्ला – अनसनरत डाक्टर गोविन्द केसीलाई हेलिकोप्टरबाट आजै काठमाडौ ल्याइने भएको छ । उहाँलाई लिन हेलिकोप्टर जुम्ला पुगेको छ ।

उहाँको स्वास्थ्य अवस्था गम्भिर बनेपछि उपचारका लागि काठमाडौ ल्याउन हेलिकोप्टर जुम्ला पठाइएको सरकारले जनाएको छ ।डाक्टर केसी २० दिनदेखि अनसन बसिरहेको कर्णाली स्वास्थ्य विज्ञान प्रतिष्ठानमा सुरक्षा व्यवस्था कडा पारिएको छ । प्रष्तिठानमा बाहिरका कसैलाई पनि प्रवेश दिइएको छैन भने अनसनस्थल सुरक्षाकर्मीले घेरेका छन् ।

डाक्टर  केसीले आफ्नो माग पूरा नभएसम्म उपचार नगराउने अडान लिनु भएको छ । सरकारी पक्षले केसीलाई कसरी काठमाडाैं ल्याउने भन्नेबारे केही पनि जनाएको छैन । सरकारी वार्ता टोलीका सदस्यले पनि यसबारेमा केही बताउन चाहेनन् ।

केसी पक्षका वार्ता टोलीले भने आफूहरुलाई सरकारी पक्षले कुनै जानकारी र समन्वय नगरको बताएको छ । २० दिनदेखिको अनसनका कारण डाक्टर केसीको स्वास्थ्यमा गम्भिर समस्या देखिएपछि सत्तारुढ दल नेकपाले केसीलाई उपचारका लागि काठमाडौ ल्याउने निर्णय हिजो गरेको थियो । केसीलाई जसरी पनि उपचारका लागि काठमाडाैं ल्याउन सरकारले हेलिकोप्टर जुम्ला पठाएको हो । 

यसैबीच सरकारले चिकित्सा शिक्षा विधेयक फिर्ता नलिने र मन्त्रीस्तरीय वार्ता टोलीपनि नबनाउने बताएको छ । शिक्षा मन्त्री गिरिराजमणी पोखरेलले शिक्षा मन्त्रालयमा पत्रकार सम्मेलन गरि सरकारले विधेयक फिर्ता नलिने र विहीबारको संसद बैठकमा यसलाई टेबुल गर्ने कार्यसूची रहेको बताउनुभयो । उहाँले डाक्टर केसीले भन्दैमा विधेयक फिर्ता र मन्त्रीस्तरीय वार्ता टोली गठन गर्न सरकार तयार नहुने पनि बताउनुभयो ।

यस्तै कर्णाली प्रदेशका मुख्यमन्त्री महेन्द्रबहादुर शाही र गृहमन्त्री नरेश भण्डारी पनि अस्पतालमा पुग्नुभएकाे छ ।