प्रहरीद्वारा गोली हानेर भारतीय नम्बरकाे गाडीमा गाँजा तस्करी गर्दै गरेका तीन जना पक्राउ

 माघ १५, २०७६ बुधबार १९:२:७ | रासस
unn.prixa.net

मकवानपुर – मकवानपुर प्रहरीले गोली प्रहार गरेर लागुऔषध गाँजा तस्करलाई नियन्त्रणमा लिएको छ । 

बीआर ०६ जे ४४५८ नम्बरको भारतीय कारमा लागुऔषध गाँजा लैजाँदै गरेका तीन जनालाई प्रहरीले पक्राउ गरेको हो । 

पक्राउ पर्नेमा कार चालक भारत मुजफ्फपुरका ३५ वर्षीय सञ्जीत पासवान,  ३५ वर्षीया अजैमल हवारी र ४५ वर्षीय जाहेरा खातुन रहेका छन् । प्रहरीका अनुसार भारतीय कारमा गाँजा बोकेका उनीहरुलाई मकवानपुरको मनहरीमा प्रहरीले जाँच गर्न खोज्दा भागेका थिए । 

जाँचका क्रममा कार भगाएको सूचनाका आधारमा नेवारपानीमा रहेको प्रहरी चौकीले कार रोक्न खोज्दा पनि नरोकी चेकजाँचमा खटिएका प्रहरीलाई समेत ठक्कर दिन खोजेर त्यभागेको जिल्ला प्रहरी कार्यालयका प्रहरी उपरीक्षक सुशीलसिंह राठौरले बताउनुभयाे । 

त्यसपछि उनीहरुलाई लेवट प्रहरी चौकीले रोक्ने प्रयास गरेको थियो ।  जिल्ला ट्राफिक प्रहरी कार्यालय अगाडि चेकिङ पोइन्ट बनाएर गाडी रोक्न खोज्दासमेत नरोकेपछि प्रहरीले गोली चलाएको हो । 

‘उनीहरुलाई पिछा गर्दै हवाई फायर गर्दा पनि नियन्त्रणमा लिन गाह्रो भएको उहाँले बताउनुभयाे । यसरी पटक पटक प्रहरी चेकिङ तोडेर भागेपछि हामीले गाडीमा लागुऔषध मात्रै नभएर गम्भीर खालको विस्फोटक पदार्थ वा अन्य कुनै खतरनाक चीजबिज रहेको हुन सक्ने ठानी रोक्ने प्रयास गर्याैँ, तर गाडी रोकिएन त्यसपछि गाडीको पाङ्ग्रामा गोली प्रहार गरेर टायर पन्चर गराएर नियन्त्रणमा लिएकाे राठौरले भन्नुभयो ।  

प्रहरीले उक्त गाडीलाई पूर्व-पश्चिम राजमार्गको मनहरीमै रोक्न खोजेको भए पनि झण्डै ३० किलोमिटर टाढा थानाभर्याङमा रोक्न सकेको हो । प्रहरीका अनुसार कारमा जाँच गर्दा पछाडिको सिटमा फल्स बटम बनाएर १६ पोकामा लुकाइराखेको ३२ किलो गाँजा बरामद गरिएको छ । यसैबीच गाँजा तस्करलाई नियन्त्रणमा लिएर फर्कंँदै गरेको प्रहरीको गाडी दुर्घटनामा परेको छ । 

काँकडभिट्टा–धनगढी चल्ने ना५ख ५५८२ नंको यात्रुवाहक बसले ना१झ १४१७ नंको प्रहरीको गाडीलार्ई ठक्कर दिँदा वडा प्रहरी कार्यालय हेटौँडाका प्रहरी निरीक्षक ईश्वरीप्रसाद भण्डारीसहित छ जना घाइते भएका प्रहरी उपरीक्षक राठौरले जानकारी दिनुभयो । 

दुर्घटनामा गाँजा तस्करीमा संलग्न महिला खातुनसमेत घाइते भएको जनाइएको छ । 

अन्तिम अपडेट: माघ १८, २०७६

तपाईको प्रतिक्रिया