नेपालकाे शानदार जित: भुटान ४-० ले पराजित

भदौ २१, २०७५ बिहीबार १७:५४:४४ | उज्यालो सहकर्मी

बंगलादेशमा जारी साफ च्याम्पियनसिप अन्तर्गत नेपालले पहिलो जित निकालेको छ । समूह ए को आफ्नो दोस्रो खेलमा नेपालले भुटानलाई ४–० गोलअन्तरले पराजित गरेको छ ।

बंगलादेशको बंगबन्धु राष्ट्रिय रंगशालामा नेपालले भुटानलाई हराएसँगै नेपालले प्रतियोगिताको सेमिफाइनलमा पुग्ने सम्भावना पनि कायमै राखेको छ ।

पहिलो खेलमा नेपाल पाकिस्तानसँग २–१ गोलले स्तब्ध भएको थियो ।

भुटानबिरुद्धको खेलमा नेपालका स्ट्राइकर सुनील बलको प्रदर्शन अविसमरणीय रह्यो । नेपालले गरेका चारमध्ये तीन गोलमा उनको प्रत्यक्ष संग्लग्नता रह्यो ।

खेलको २१औं मिनेटमा नेपालले अग्रता लिएको थियो । सुनील बलको कर्नर प्रहारमा डिफेण्डर अनन्त तामाङले पेनाल्टी एरियाबाट शानदार गोल गरी नेपाललाई अग्रता दिलाएका थिए । यो अनन्तको दोस्रो अन्तर्राष्ट्रिय गोल हो ।

पहिलो हाफमा १–० को अग्रता बनाएको नेपालले दोस्रो हाफमा ३ गोल थप्यो । ६९औं मिनेटमा भुटान १० खेलाडीमा सीमित हुँदा नेपालले पेनाल्टीको अवसर पाएको थियो । निमा वाङदीले नेपालका निराजन खड्कालाई डिबक्समा फल गरेपछि दोस्रो पहेँलो कार्ड खाँदै वाङदी मैदानबाट बाहिरिए ।

पेनाल्टी अवसरमा बिमल घर्तीमगरको प्रहार भुटानका गोलरक्षक छिरिङ देण्डुपले रोकेका थिए । तर, रिबाउण्ड बलमा सुनीलले गोल गरी नेपाललाई २–० को अग्रता दिलाए ।

७६औं मिनेटमा अञ्जन विष्टलाई रिप्लेस गरी मैदान छिरेका भरत खवासले तीन मिनेटपछि नै उत्कृष्ट गोल गरे । मध्यक्षेत्रबाट एक्लै बल लगेर उनले शानदार फिनिसिङ गरेका थिए ।

खेलको नियमित समय सकिनु २ मिनेटअघि नेपालले चौथो गोल गरेको थियो । सुनील बलको पासमा निराजन खड्काले गोल गरेका हुन् ।

जितसँगै नेपालको ३ अंक भएको छ । भने, सेमिफाइनल प्रवेशको सम्भावना पनि कायमै राखेको छ । समूहको अन्तिम खेलमा नेपालले घरेलु टोली बंगलादेशसँग प्रतिस्पर्धा गर्दैछ । सेमिफाइनल प्रवेशका लागि नेपालले बंगलादेशलाई हराउनुपर्नेछ ।

अन्तिम अपडेट: कात्तिक २०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्