काठमाण्डाै – प्रधानमन्त्री शेरबहादुर देउवाले कोभिड–१९ (काेराेना भाइरस) महामारी पूर्णरूपमा नियन्त्रण गर्नुपर्ने बताउनुभएकाे छ । केही समयता मत्थर हुँदै गएको कोभिड महामारी फेरि फैलिने खतरा देखिएको उल्लेख गर्दै प्रधानमन्त्री देउवाले त्यसलाई पूर्णरूपमा नियन्त्रण गर्नुपर्ने खाँचो रहेको बताउनुभएको हो । 

वीर अस्पतालको १३३ औँ वार्षिकोत्सवको अवसरमा आज बिहीवार आयोजित एक कार्यक्रममा बोल्दै उहाँले भविष्यमा आउन सक्ने विभिन्न महामारीको नियन्त्रणका लागि पनि सरकारले आफ्नो सामर्थ्यकाे विकास गर्नुपर्ने बताउनुभयो । क्यान्सरजस्ता घातक रोगहरूको समयमै सहज ढङ्गले उपचार हुने व्यवस्था मिलाउन पनि सम्बन्धित स्वास्थ्य संस्थाहरूले ध्यान दिने प्रधानमन्त्री देउवाले विश्वास व्यक्त गर्नुभयो । 

उहाँले भन्नुभयो, ‘कोभिड महामारी पुनः विस्तारै फैलिँदै जाने खतरा देखिएको छ । यसलाई पूर्णरूपमा नियन्त्रण गर्दै भविष्यमा आउन सक्ने अन्य विभिन्न किसिमका महामारीसँग जुध्ने सामर्थ्य हामीले विकास गर्नुपर्ने खाँचो छ ।’

प्रधानमन्त्री देउवाले सर्वसाधारण नागरिकलाई स्वास्थ्य सेवा सर्वसुलभ ढङ्गले उपलब्ध गराउन सरकार कटिबद्ध रहेको पनि बताउनुभयो । स्वास्थ्य सेवालाई नागरिकको मौलिक हकको रूपमा संविधानमै व्यवस्था गरेको स्पष्ट पार्दै उहाँले सरकारले त्यसका लागि आवश्यक बजेटको व्यवस्थासमेत गरेको सुनाउनुभयाे । 

कार्यक्रममा प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठले क्यान्सरजस्ता घातक रोगका लागि सहज ढङ्गले उपचार गराउन सरकारले बजेटको व्यवस्था गरे पनि त्यसको सदुपयोग गर्न नसकेको भन्दै वीर अस्पताल व्यवस्थापनको आलोचना गर्नुभयो । उहाँले वीर अस्पताल देशकाे सबैभन्दा जेठो अस्पताल भएको उल्लेख गर्दै स्वास्थ्य क्षेत्रका लागि आवश्यक जनशक्तिको विकासमा ध्यान दिनुपर्ने आवश्यकता पनि औँल्याउनुभयो ।

वीर अस्पतालका कार्यवाहक प्रमुख प्रशासकीय अधिकृत डा. भुपेन्द्रकुमार बस्नेतले बिरामीको चापलाई धान्न सक्ने गरी अस्पतालमा आवश्यक जनशक्तिको व्यवस्थापन गरिदिन सरकारसँग माग गर्नुभयो । उहाँले पूराना भौतिक संरचनाहरूको पुनर्निर्माणका लागि अस्पताललाई बजेटको समेत आवश्यकता रहेकाे बताउनुभयो ।

अस्पतालले बिरामीकाे स्वास्थ्य उपचारमा सकेको योगदान गर्दै आएको कार्यवाहक प्रमुख प्रशासकीय अधिकृत बस्नेतकाे भनाइ छ ।