भक्तपुर – भक्तपुरको वाराहीस्थान चोक, सूर्यविनायकमा एउटा टिप्परले मोटरसाइकललाई ठक्कर दिँदा मोटरसाइकल चालकको घटनास्थलमै ज्यान गएको छ । मृतकको सनाखत भएको छैन ।

काभ्रेबाट काठमाडौंतर्फ आइरहेको टिप्परले ठक्कर दिँदा मोटरसाइकल चालकको घटनास्थलमै ज्यान गएपछि सूर्यविनायक क्षेत्र अहिले तनावग्रस्त रहेको छ ।

स्थानीयको आक्रोशित भिडले टिप्परमा आगो लगाएका छन् । प्रहरीले भिडलाई नियन्त्रणमा लिन लाठीचार्ज गरेको छ । अवस्था तनावग्रस्त भएपछि टिप्परमा लागेको आगो निभाउन गएको दमकल घटनास्थल पुग्न सकेको छैन ।

केही दिनदेखि प्रहरीको मिलेमतोमा काभ्रेको साँगा भञ्ज्याङबाट साँझ पाँच बजेदेखि नै टिप्पर छोडिने गरेको भन्दै स्थानीयले विरोध गर्दै आएका थिए । बेलुका आठ बजेदेखि मात्रै टिप्पर प्रवेश गर्न पाउने भए पनि प्रहरीले नै चाँडै नै टिप्परलाई प्रवेश दिने गरेको आरोप लाग्दै आएको छ ।

घटनाको विस्तृत विवरण आउन बाँकी रहेको प्रहरीले जनाएको छ ।