दाङ – ठाडो भिर काट्दै र कडा चट्टान फोड्दै सल्यानकाे छत्रेश्वरी गाउँपालिकाले दुर्गम बस्तीका लागि सडक खन्न थालेपछि स्थानीयवासी उत्साहित भएका छन् । वर्षाैँदेखि सडकको सपना बोकेका छत्रेश्वरी गाउँपालिका–४ का दुर्गम बस्ती भेरिखोर, आकाशी र कालुपहरका स्थानीयवासी गाउँपालिकाले मोटरबाटो बनाउन थालेपछि उत्साहित भएका हुन् ।

निकै जटिल भूगोल भए पनि दुर्गम बस्तीमा मोटरबाटो पुर्‍याउने लक्ष्यका साथ काम गरिरहेकाे गाउँपालिकाले जनाएको छ । झङ्खानी आकाशी हुँदै त्रिवेणी जोड्ने सडक निर्माण भएपछि १५ घरधुरिलाई लाभ पुग्ने अकाशी गाउँका बस्ने खिमे कामीले बताउनुभयाे । ‘गाउँमा तरकारी, जडीबुटी, फलफूल उत्पादन हुन्छ तर उत्पादित वस्तुलाई बजारसम्म पुर्‍याउन निकै समस्या भइरहेको छ’, उहाँले भन्नुभयाे, ‘अब बाटो बन्यो भने सजिलो हुने थियो ।’

छत्रेश्वरी–४ को पोखरासम्म यसअघि नै मोटरबाटो पुगिसकेको छ । झङ्खानी आकाशी हुँदै त्रिवेणी जोड्ने सडक बनेपछि त्यस क्षेत्रका नागरिककाे जनजीवन फेरिने गाउँपालिकाका अध्यक्ष ओजबहादुर बुढाथोकीले बताउनुभयाे । उहाँले गाउँपालिकाकै एक्स्काभेटरमार्फत काम भइरहेकाे बताउनुभयाे ।

आठ दिनसम्म चट्टान फाेडेर झन्डै चार मिटर चाैडाइकाे एक सय ६० मिटर सडक खनेकाे एक्स्काभेटर अपरेटर प्रेमबहादुर विष्टले बताउनुभयाे । उहाँले भन्नुभयाे, ‘भूगोल एकदमै ठाडो छ, त्यसमाथि कडा चट्टान छ । माथिबाट ढुङ्गा खस्ने जोखिम छ । मैले छत्रेश्वरीमा काम गर्दैगर्दा अहिलेसम्मको जटिल भूगोल सायद यही नै होला ।’

स्थानीयवासीले जसरी भए पनि आफ्नो गाउँसम्म सडक बनाउन गाउँपालिकालाई आग्रह गर्दै सडक बनेपछि उत्पादित कृषिजन्य वस्तु बजारीकरणमा सहज हुने आशा गरेका छन् । आफ्नो बस्तीमा गोभी, काउली, आलु, अदुवा, टिमुर, कागती उत्पादन हुने स्थानीय फौदबहादुर खत्रीले बताउनुभयाे । सडक अभावमा अहिले भीरको जटिल बाटो हिँड्न बाध्य हुनुपरेकाे उहाँकाे भनाइ छ । अब भेरिखोरसम्म मोटरबाटो जोड्न झन्डै १५ सय मिटर सडक खन्न बाँकी छ ।