काठमाण्डौ – अरनिको राजमार्ग अन्तर्गत धुलिखेल–खावा सडक विस्तारमा ढिलाइ भएको भन्दै जिल्ला समन्वय समिति काभ्रेका प्रमुख दिपककुमार गौतमले अनशन थाल्नुभएको छ । गौतमले हिजो दिउँसोदेखि आमरण अनसन थाल्नुभएको हो । सडक विस्तारमा ढिलासुस्ती हुँदा लाखौँ नागरिकले सास्ती व्यहोर्नु परेको उहाँको भनाइ छ ।

सडक विस्तार तथा स्तरोन्नतीको ठेक्का पाएको गौरी पार्वती निर्माण सेवा प्रालिले ठेक्का सम्झौता भएको २० महिना पूरा हुँदा पनि लक्ष्य अनुसारको काम नगरेको गौतमले बताउनुभयो । सडक बन्ने आधार पेस नभएसम्म आफ्नो आमरण अनशन नतोड्ने उहाँको अडान छ ।

अरनिको राजमार्ग अन्तर्गतको धुलिखेल–खावा सडक विस्तार तथा स्तरोन्नती गर्ने उद्देश्यले डिभिजन सडक कार्यालय भक्तपुर र गौरी पार्वती निर्माण सेवा प्रालिबीच २०७९ जेठ २० गते सम्झौता भएको थियो ।

धुलिखेलदेखि खावासम्मको चार किलोमिटर सडक विस्तारको काम ठेक्का सम्झौता भएको मितिले २२ महिना अर्थात् २०८० चैत १९ गते सम्पन्न गर्ने सम्झौतामा उल्लेख छ । निर्माण व्यवसायीले काममा ढिलाए गरेको भन्दै सडक डिभिजन कार्यालय भक्तपुरले ठेक्का रद्द गर्ने प्रक्रिया अघि बढाएको छ ।