मजदुरले ज्याला नपाउँदा चीनको तिब्बत जोड्ने सडक निर्माणमा अवरोध

फागुन २, २०७५ बिहीबार १३:१३:५५ | डीबी बिष्ट

बझाङ – सदरमुकाम चैनपुरबाट ८५ किलोमिटरको दूरीमा रहेको चीनको स्वशासित क्षेत्र तिब्बत जोड्ने सडकको निर्माण कार्य रोकिएको छ ।

सडक निर्माणका मजदुरहरुले ज्याला नपाएपछि काम रोकिएको हो । ज्याला नपाएको भन्दै आन्दोलनमा उत्रिएपछि गएको २२ गते सोमबारदेखि सडक पनि अवरुद्ध भएको छ ।

गाउँमा सडक निर्माणको काम सुरु भएपछि एकाघरका दुई÷चार जनासम्मले काम गर्न थाले । काम गरेको साढे दुई महिना बढी भइसक्दा पनि ज्याला नपाएपछि सडक अवरुद्ध गरेको बताएका छन् । तल्कोट गाउँपालिका वडा नम्बर ३ की देवकला देवी बोहराले सडक खण्डमा पुगेर बालुवा, गिट्टी, ढुङ्गा ओसार पोसारलगायतका काम गर्न थाल्नुभयो । काम गरेको ८० दिन पुग्दासमेत उहाँले मजदुरीबापतको ४० हजार रकम पाउनुभएन ।

त्यस्तै तल्कोट गाउँपालिका वडा नम्बर ३ का झण्डै एक सय ३२ जनाले ताक्लोकोट सडक खण्डमा मजदुरी गरेबापतको रकम लिन बाँकी छ । केहि स्थानीय मजदुरले भने आधा रकम पाएको बताएका छन् । अहिले ठेकेदारहरु पनि फरार रहेका छन् । कामदारको रकम नदिई कहाँ गए भनेर आफूहरुलाई थाहा नभएको स्थानीय कामदार नन्दलाल जोशीले बताउनुभयो । जोशीले पनि सडकमा ढुङ्गा फुटालेको तथा मजदुरी गरेबापतको ११ हजार भन्दा बढी पैसा लिन बाँकी रहको बताउनुभयो ।

यहाँका धेरै जस्तो स्थानीय बासिन्दाको १० हजार देखि ४० हजारसम्म गरि झण्डै १६ लाखभन्दा बढी रकम लिन बाँकी देखिएको तल्कोट गाउँपालिका वडा नम्बर ३ का वडा अध्यक्ष भरत बोहराको भनाई छ । वडा कार्यालयले पहल गर्दा समेत सुनुवाइ नभएपछि यहाँका स्थानीय बासिन्दाले केही दिन अघि वडापालिकामा समेत ताला लगाएको उहाँले बताउनुभयो ।

तल्कोट गाँउपालिका वडा नम्बर ३ भित्र सडक कटानको जिम्मा नागार्जुन कन्टक्सन प्रा.लि.ले पाएको थियो । यता सडक कटानको जिम्मा पाएका नागार्जुन कन्टक्सन प्रा.लि. ठेकदार दिपकबहादुर सिँहले आफूहरुले दिनु पर्ने सबै मजदुरको पैसा वडाध्यक्षको रोहबरमा दिइसकेको र विचका केहि व्यक्तिहरुबाट त्यस्तो बेइमान भएको हुन सक्ने बताउनुभयो ।

आफूहरुले मजदुरलाई मार्का पार्ने काम नगरेको र मजदुरलाई नठगेको बताउँदै पेटी ठेगेदार र वडा अध्यक्षको रोहबरमा सम्झौता अनुसारको रकम दिएको बताउनुभयो । यता वडा अध्यक्ष भरतबहादुर बोहराले मजदुरको सबै रकम नआएको र १६ लाख ४३ हजार रुपैयाँ मात्र प्राप्त रकमले केहि मजदुरले आधा रकम पाएकोे बताउनुभयो ।

यस विषयमा विवाद आएपछि सडकमा डिभिजन कार्यलयका प्रमुख ऐन हादुर सिँह, प्रमुख जिल्ला अधिकारी प्रेमसिँह कुवँर, जिल्ला समन्वय समितिका संयोजक खडकबहादुर खड्का र ठेकेदार ईश्वरीप्रसाद भट्टसहितको टोली यहाँका स्थानीय मजदुरसँग कुरा बुझ्न तल्कोट गाँउपालिका–३ को कार्यालयमा पुगेको वडाध्यक्ष बोहराले बताउनुभयो । मजदुरसँग टोलीले पेटी ठेकेदारहरुलाई एक महिनाभित्र बोलाएर छलफल गराउने सहमति भएको बोहराको भनाइ छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्