नेपाल र यूएईबीच नयाँ श्रम समझदारी गर्ने सहमति, १२ वर्षअघिको समझदारी खारेज हुने

वैशाख १२, २०७६ बिहीबार १७:२८:२१ | उज्यालो सहकर्मी

काठमाण्डौ – नेपाल र यूएईबीच नयाँ श्रम समझदारी गर्ने सहमति जुटेको छ । पुरानो श्रम समझदारीलाई खारेज गर्दै कामदारको सुरक्षाको प्रत्याभूत हुनेगरी नयाँ श्रम समझदारी गर्ने सहमति भएको श्रम रोजगार तथा सामाजिक सुरक्षा मन्त्रालयले जनाएको छ ।

यूएईबाट आएको प्रविधिक टोलीसँग बुधबार र बिहीबार भएको छलफलबाट श्रम समझदारीको अन्तिम मस्यौदामा हस्ताक्षर भएको मन्त्रालयले जनाएको छ ।

मस्यौदामा नेपालबाट कामदार जाँदा शून्य लागतमा जान पाउने, म्यानपावरको सेवा शुल्क पनि रोजगारदाताले नै व्यहोर्ने, बीमाको व्यवस्थासहित सामाजिक सुरक्षाको पनि ग्यारेण्टी हुने व्यवस्था रहेको श्रम मन्त्रालय स्रोतले जनाएको छ । साथै करारपत्र कस्तो हुने भन्ने विषयमा पनि दुई देशबीच सहमति जुटेको छ ।

नयाँ समझदारीमा काममा रहँदाको बीमा र स्वाथ्य बीमा हुने प्रावधान राखिएको छ । कामदारको लापरवाहीका कारणले हुने दुर्घटना बाहेक अरु दुर्घटना काममा रहँदाको बीमाले समेट्ने छ ।

अब दुबै देशको मन्त्रिपरिषद बैठकले समझदारीको मस्यौदालाई पारित गरेपछि औपचारिक हस्ताक्षरका लागि मिति तय गरेर मन्त्री स्तरमा हस्ताक्षर हुनेछ । श्रम समझदारीमा कामदारलाई आर्थिक भार नपर्ने गरी आधारभूत अधिकारका साथै सुरक्षाको सुनिश्चितता गरिने उल्लेख छ ।

यसअघि नेपाली टोलीले माघ १६ र १७ गते यूएईसँग श्रम समझदारीबारे छलफल भएको थियो । यूएईसँग दुई चरणमा श्रम समझदारीका लागि मस्यौदा आदानप्रदान भसकेको थियो ।

पहिलो चरणमा यूएईले पठाएका मस्यौदामा नेपालले चाहेजस्ता विषय उल्लेख नभएकाले नेपाली टोली नै यूएई गएर आफ्ना एजेन्डा स्पष्टसँग राखेको थियो । यूएईसँग यसअघि २००७ मा श्रम समझदारी भएको थियो ।

श्रम, रोजगार तथा सामाजिक सुरक्षा मन्त्री गोकर्ण विष्टले जिम्मेवारी सम्हालेपछि मलेसिया र जापानसँग श्रम सम्झौता भइसकेको छ । कतार र ओमानसँग पनि सरकारले छिट्टै श्रम समझदारी गर्ने तयारी गरिरहेको मन्त्रालयले जनाएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्