दुई सरकारी कार्यालयबीच समन्वय नहुँदा होलेरी–स्वर्गद्वारी सडक स्तरोन्नतिको काम अलपत्र

असार १६, २०७६ सोमबार १६:३२:४७ | माधवकुमार ओली

रोल्पा – सडक डिभिजन कार्यालय र डिभिजन वन कार्यालयबीच समन्वय हुन नसक्दा रोल्पाको होलेरी–स्वर्गद्वारी सडक स्तरोन्नति गर्ने काम अलपत्र परेको छ ।

सडक चौडा गर्दा वन फँडानी भएको भन्दै डिभिजन वन कार्यालय रोल्पाले मुद्दा हालेपछि सडक स्तरोन्नतिको काम रोकिएको हो । सडक डिभिजन कार्यालय प्यूठानले वातावरणीय प्रभाव मूल्याङ्कन नै नगरी काम सुरु गरेको वन कार्यालयको आरोप छ ।

सडक डिभिजनले भने रुख काट्ने सहमति भएपछि मात्र काम सुरु गरेको बताउँदै आएको छ । दुई सरकारी कार्यालयको विवादका कारण सडक स्तरोन्नति गर्ने काम रोकिँदा पवित्र तीर्थस्थल स्वर्गद्वारी जाने तीर्थयात्रीलाई सास्ती भोग्नु परेको छ भने दैनिक रुपमा सञ्चालन हुने यातायातका साधन आवतजावतमा पनि समस्या भएको छ ।

एउटा सरकारी कार्यालयले गरेको काममा अर्काे सरकारी कार्यालयबाटै अवरोध हुँदा स्थानीयले सास्ती भोग्नु परेको रुन्टीगढी गाउँपालिका–५ का वडाध्यक्ष यामबहादुर दशौदीको गुनासो छ ।

‘एउटा सरकारी कार्यालयले सुरु गरेको काम अर्काे सरकारी कार्यालयले रोक्नु यहाँका स्थानीयका लागि दुर्भाग्यपूर्ण बनेको छ’, दशौंदीले भन्नुभयो, ‘वर्षायाममा हिलो र हिउँदमा धुलोले स्थानीय हैरान भएका छन् ।’ स्थानीयको मागलाई नबुझेर वन कार्यालयले मुद्दा हालेपछि सास्ती खेप्नु परेको उहाँको भनाइ छ ।

५ किलोमिटर सडक स्तरोन्नति गरी कालोपत्रे गर्ने जिम्मा लोहनीबरदेवी रानीबन जेभी कम्पनीले पाएको थियो । साढे ५ करोडको लागतमा यो सडक स्तरोन्नति गरी कालोपत्रे गर्ने काम गएको चैतमा नै सक्ने योजना थियो, तर कार्तिकमा नै मुद्दा परेपछि काम ठप्प भएको हो ।

दुई कार्यालयबीच समन्वय गरी सडक स्तरोन्नतिको काम तत्काल सुरु गर्नुपर्ने स्थानीयको माग छ ।

अन्तिम अपडेट: मंसिर १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

माधवकुमार ओली

रोल्पाका पत्रकार माधवकुमार ओली उज्यालोका जिल्ला सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्