पाँच वडामा एक जना सचिव

साउन १, २०७६ बुधबार १०:३७:२३ | नवीन गुरुङ

संखुवासभा — भोटखोला गाउँपालिकाको पाँच वडा हेर्नका लागि एक जनामात्रै सचिव रहेका छन् । गाउँपालिका भित्रका पाँच वटा वडा हेर्न एकजना मात्रै सचिव हुदाँ सेवा प्रवाहमा समस्या आएको छ ।

सिंगो गाउँपालिकामा नै एक जना मात्रै वडा सचिव हुँदा सास्ती खेप्न बाध्य भएको स्थानीयहरु बताउँछन् । गाउँपालिकाको स्थापनाकालदेखि नै एक जना वडा सचिवको भरमा सिंगो गाउँपालिका चलिरहेको छ । सबै वडामा काम गर्नु गर्दा कहिलेकाहीँ कामको चापले सेवाग्राही मर्कामा पर्ने सचिब दाबा लामा बताउनुहुन्छ ।

जिल्लाको दुर्गम भोटखोला गाउँपालिकामा दरबन्दी अनुसारका कर्मचारी जान मान्दैनन् । यो गाउँपालिकामा कुल दरबन्दी २७ जना भए पनि पाँच जना अस्थायी कर्मचारीबाट गाउँपालिकाको सम्पूर्ण कामकाजहरु सञ्चालन हुने गरेको गाउँपालिकाका अध्यक्ष तेम्बा भोटेले बताउनुभयो ।

भोटखोला गाउँपालिका दुर्गम भएको कारणले नै कर्मचारी आउन मान्दैनन् । मन्त्रालयले सरुवा गरेर पठाए पनि बाध्यतामा एक÷दुई महिना बस्ने अनि तत्काल सरुवा मिलाउने सरुवा नभएको खण्डमा काज मिलाएर प्रदेश, संघ र सुगमका स्थानीय तहमा जाने गरेको गाउँपालिकाका अध्यक्ष भोटेले बताउनुभयो । उहाँले भन्नुभयो ‘दुर्गम भएकै कारणले कर्मचारी नबस्ने भएपछि कर्मचारीलाई गाउँपालिकाले थप चार हजार रुपैयाँ दुर्गम भत्ता दिने निर्णय गरेको छ । तर पनि कर्मचारी बस्न मान्दैनन् ।’

सडक सञ्जाल समेत नपुगेको भोटखोलाकाको ५ वटै वडा हिँडेर पुग्नु पर्ने बाध्यता छ । भौगोलिक रुपमा विकट भएका कारण सबै वडा कार्यालयमा पुगेर सेवा दिन ज्यादै कठिन हुने गरेको वडा सचिव लामाले बताउनुभयो । सचिब लामाले भन्नुभयो ‘पैदल हिडेर हरेक वडामा महिनामा तीन÷चार दिनमा एकपटक सेवा दिन पुग्छु । गाउँपालिका भित्रका एक वडाबाट अर्को वडा पुग्न नै दुई दिन हिँड्नु पर्छ । दैनिक सबै वडामा पुग्न सकिँदैन ।’

भोटखोला गाउँपालिकाको थुदामबाट वडा नम्बर २ को वडा कार्यालय च्याम्ताङ आउन करिब तीन दिन लाग्छ । वडा कार्यालय पुगे पनि वडाले दैनिक रुपमा सेवा दिन नसक्दा सर्वसाधारणहरुले समेत हैरानी ब्यहोर्नु परेको छ ।

भोटखोला गाउँपालिकामा करिब ६ हजार ५७६ जनसंख्या रहेको छ । सडक, विद्युत् र सञ्चारसमेत छैन । सडक, विद्युत् र सञ्चार सेवा समेत नहुदाँ अझै समस्या हुने गरेको सचिव लामाको भनाइ छ । दक्ष जनशक्ति र सञ्चारसमेत नहुँदा सेवा प्रवाहसमेत प्रभावकारी हुन नसकेको कर्मचारीहरु बताउँछन् ।

भोटखोलामा अहिले प्रमुख प्रशासकीय अधिकृत, सहलेखापाल, नायब सुब्बा (वडा सचिव र कृषि शाखा प्रमुख), खरिदार, खानेपानी सरसफाइ प्राविधिक स्थायी कर्मचारी रहेका छन् । २७ जनाको दरबन्दी भए पनि स्थायी कर्मचारी पाँचजना मात्र रहेका छन् । कर्मचारी अभावले गाउँ–गाउँमा सिंहदरबार पुर्‍याउन अझै कठिन भएको गाउँपालिका अध्यक्ष भोटेले बताउनुभयो ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्