व्यवसायिक तरकारी खेतीमा कृषि सहकारी : तरकारीको आयात रोक्ने उद्देश्य

भदौ २, २०७६ सोमबार १०:२६:० | श्यामशितल परियार

लमजुङ – सुन्दरबजार नगरपालिका वडा नम्बर ६ मा रहेको साना किसान कृषि सहकारी संस्था लिमिटेडले व्यवसायिक तरकारी खेती सुरु गरेको छ ।

सहकारीले सुन्दरबजार नगरपालिका–६ को ठाँटीचौर खदापानीमा झण्डै १७ रोपनी जग्गा १० वर्षका लागि भाडामा लिएर व्यवसायिक तरकारी खेती सुरु गरेको हो ।

सहकारीका प्रबन्धक दिनेशबाबु कोइरालाका अनुसार सहकारीले विसं २०७५ साल चैतबाट तरकारी खेती सुरु गरेको हो । ‘वार्षिक ४० हजार रुपैयाँ भाडा तिर्ने गरी स्थानीय चार जनाको जग्गा भाडामा लिएर तरकारी खेती सुरु गरिएको हो,’ प्रबन्धक कोइरालाले भन्नुभयो ।

हाल चार ओटा प्लास्टिक टनेलमा गोलभेँडा उत्पादन भैरहेको छ । एउटा प्लास्टिक टनेलमा काँक्रो र अर्को टनेलमा ‘क्याप्सिकम’ उत्पादन भैरहेको छ । खुर्सानी खेती पनि गरिएको छ । २० मिटर लम्बाइ र ६ मिटर चौडाइको २ ओटा ‘ग्रीन हाउस’ पनि बनाइएको छ । ‘ग्रीन हाउस’ मा गोलभेँडा लगाउने तयारी भैरहेको सहकारीले जनाएको छ ।

कृषिमा लाग्न प्रेरित गर्ने

यस वर्षभित्रमा २० ओटा टनेल बनाइ तरकारी खेती विस्तार गर्ने सहकारीको लक्ष्य छ । अर्गानिक तरकारी उत्पादनमा जोड दिँदै बाहिरबाट आउने तरकारी रोक्नका लागि तरकारी खेती सुरु गरिएको प्रबन्धक कोइरालाले बताउनु भयो ।

‘हामीले सुरु गर्दै गरेको कृषि फार्मले अन्य किसानलाई कृषिमा लाग्न प्रेरित गर्नेछ भन्ने विश्वास लिएका छौँ,’ उहाँले भन्नु भयो, ‘यसले बाहिरबाट आउने तरकारीलाई केही मात्रामा भए पनि रोक्छ । स्थानीय उत्पादनले बजार पाउँछ र रोजगारीको समेत सिर्जना गर्न सक्छ ।’

संरचना निर्माणसहित गरेर कृषि फर्ममा झण्डै १६ लाख रुपैयाँ लगानी भैसकेको उहाँले बताउनु भयो । तरकारी खेती गर्न कृषि ज्ञान केन्द्र लमजुङले सिँचाइका लागि ३ लाख रुपैयाँ सहयोग गरेको थियो ।

गोलभेँडा उत्पादन प्राथमिकतामा

विशेषगरी सुरुवातको चरणमा सहकारीले गोलभेँडा उत्पानलाई जोड दिएको छ । बजारमा गोलभेँडाको माग र मूल्य राम्रो भएका कारण गोलभेँडा खेतीलाई उच्च प्राथमिकतामा राखिएको प्रबन्धक कोइरालाले बताउनु भयो । सहकारीले गोलभेँडाको बिरुवा तयार गरी बिक्री समेत गरेको छ ।

कृषि फार्मबाट पहिलो उत्पादन लिने बेला भएको छ । फार्मबाट उत्पादित कृषि उपज स्थानीय सुन्दरबजार, खत्रीठाँटी, सिउँडीबार लगायतका ठाउँमा नै खपत हुनेमा सहकारी ढुक्क छ ।

उत्पादनलाई साना किसान कृषि सहकारी संस्थाको केन्द्रीय संघ काठमाण्डौ र इलाका संघ पोखराले पनि बजारीकरणमा सघाउने उहाँले बताउनु भयो ।

फार्म विस्तार गरिँदै

बिस्तारै फार्म विस्तार गरिने र त्यसपछि सबै किसिमका तरकारी उत्पादन गरिने प्रबन्धक कोइरालाले जानकारी दिनुभयाे । सहकारीले नै कृषि कर्म सुरु गरेमा त्यसको सिको गर्दै सहकारीमा आबद्ध किसानले पनि कृषि कर्ममा पाइला चाल्ने सहकारीले विश्वास लिएको सहकारिकी अध्यक्ष सुकमाया गुरुङले बताउनुभयो ।

कृषि कर्मलाई चुस्त दुरुस्त रुपमा अघि बढाउनका लागि वीरबहादुर थापाको संयोजकत्वमा कृषि फार्म सञ्चालन उपसमिति समेत गठन गरिएको छ । सहकारी सञ्चालक समितिका साथै कृषि फर्म सञ्चालन उप–समितिले फर्मको रेखदेखका साथै गोडमेल लगायतका कार्यमा सघाउँदै आएको छ ।

फार्मबाट तीन जनाले पूर्ण रोजगारी पाएका छन् । कृषि फर्मबाट आंशिकरुपमा केही स्थानीयले समेत रोजगारी पाएका छन् । १५ सय जना साना किसान कृषि सहकारीमा सदस्य छन् । सहकारीले सुन्दरबजार नगरपालिकालाई कार्यक्षेत्र बनाएर काम गर्दै आएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्