द्वन्द्व पीडितको पीडा : खुशी खोसियो, कोख रित्तियो

कात्तिक ७, २०७६ बिहीबार १२:५०:४४ | हरि हुमागाईं

मकवानपुर - उमेरले छ दशक काटिसकेको छ, आफ्नै घर पनि बिस्तारै बिरानो हुँदैछ । बुढेसकाल लाग्दैछ । घर खरले छाएको छ, भित्ता माटोले लिपिएको छ ।

मकवानपुरको बकैया गाउँपालिका ९ का ६१ बर्षीय भीमबहादुर रखाल सुस्केरा हाल्दै घरको पिँडीमा थ्याथ्च बस्नुहुन्छ । उहाँकी ६० वर्षीया पत्नी बर्तमायाँ घर नजिकैको खोरमा रहेको बाख्रालाई घाँस हाल्न जानुहुन्छ । तत्कालीन विद्रोही माओवादीले सञ्चालन गरेको सशस्त्र युद्धका क्रममा भीमबहादुरले दुई छोरा गुमाउनुभयाे ।

जेठा छोरा अर्जुनको त पत्तो नै लागेको छैन । २०५७ सालमा सादा पोशाकमा खटिएका प्रहरीले बल खेल्ने क्रममा रौतहटबाट अर्जुनलाई पक्राउ गरेर बेपत्ता बनाएका हुन् । अर्जुनको विषयमा उहाँलाई केही थाहा छैन । कान्छो छोरा डिलबहादुर भने २०६० सालतिर सिरहाकाे भिडन्तमा मारिएको पार्टीका मान्छे (तत्कालीन माओवादी) का कार्यकर्ताहरुले भीमलाई जानकारी गराएका छन् ।

डिलबहादुरको पनि शव उहाँले पाउनुभएन । काजकिरिया दुवै छोराको बाँकी छ । उहाँले छोराहरुको अभावमा बाँच्नै गाह्राे भएको पीडा पोख्नुभयाे । अहिले हिजो युद्ध गरेकै पार्टी सरकारमा भए पनि आफूहरुलाई कहिल्यै नहेरेको देख्दा आफूहरुलाई पनि मारिदिए हुन्थ्यो जस्तो लागेको भीमबहादुरको भनाइ छ ।

पढाइ रोकियो

अर्जुन रखाललाई प्रहरीले पक्राउ गरी बेपत्ता बनाउँदा उनकी छोरी लक्कीकाे उमेर दुई वर्ष थियाे, अहिले उहाँ १९ वर्षकाे हुनुभयाे । बुवाको नाममा राज्यले दिएको दश लाख रुपैयाँमध्ये केही रकम खर्च गरेर उहाँले कक्षा १२ सम्मको पढाइ सक्नुभएकाे छ । अब पैसा नभएका कारण पढ्न नपाएको लक्कीले गुनासो गर्नुभयो ।

कमाउने, संरक्षण गर्ने बावु नै नभएपछि आफ्नो पढाइ रोकिएको उहाँले बताउनुभयो । अर्जुनकी पत्नी पद्मा रानाले रौतहटको चपुरमा सानो पसल सञ्चालन गरेकाे र त्यही पसलकाे आम्दानीले आफूहरुको गुजारा चलेको लक्कीको भनाइ छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हरि हुमागाईं

मकवानपुरका उज्यालो सहकर्मी हरि हुमागाईं नेपाल पत्रकार महासंघको पूर्व जिल्ला अध्यक्षसमेत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्