लिपुलेक र कालापानी हाम्रो हो, भूमि अतिक्रमण यो सरकारलाई मान्य छैन : मन्त्री अर्याल

कालापानीमा देखिएको समस्याका बारेमा सरकार चुप लागेर बस्दैन : मन्त्री बाँस्काेटा

कात्तिक २२, २०७६ शुक्रबार १५:४४:४५ | उज्यालो सहकर्मी

स्याङ्जा – भूमि व्यवस्था, सहकारी तथा गरिबी निवारण मन्त्री पद्मा अर्यालले लिपुलेक र कालापानी नेपालको भएको बताउनुभएको छ ।

स्याङ्जाको कालीगण्डकी गाउँपालिका-३ मा रहेको आलमदेवी मन्दिरको तस्बिर अंकित हुलाक टिकट सार्वजनिक गर्दै मन्त्री अर्यालले सुगौली सन्धिमा कालीगण्डकी नदी नेपाल र भारतको सीमा भएको उल्लेख भएको आधारमा पनि ती क्षेत्र नेपालकै भएको उहाँको भनाइ थियो ।

राष्ट्रियता कमजोर हुन नदिने र भूमि अतिक्रमण वर्तमान सरकारलाई अमान्य हुने भन्दै मन्त्री अर्यालले सीमा क्षेत्रमा देखिएको विवादका बारेमा सरकारले जनहितको निर्णय गर्ने बताउनुभयो ।

कार्यक्रममा नेपाल सरकारका प्रवत्ता एवं सञ्चार तथा सूचना प्रविधि मन्त्री गोकुल बाँस्कोटाले कालापानीमा देखिएको समस्याका बारेमा सरकार चुप लागेर नबस्ने बताउनुभएको छ ।

प्रवक्ता बाँस्कोटाले सीमा विवादमा देखिएको समस्या समाधान गर्न सरकारले कुटनीतिक र राजनीतिक हिसाबले कदम चाल्ने स्पष्ट पार्नुभयो ।

विश्वका महाशक्ति राष्ट्रहरुले चलाएका युद्ध पनि छलफल र वार्ताकै माध्यमबाट समाधान भएको भन्दै मन्त्री बास्कोटाले अहिले देखिएको समस्या सल्टाउन सरकार सक्रियताका साथ अघि बढेको दाबी गर्नुभयो ।

कार्यक्रममा मुख्य सचिव, राष्ट्रिय योजना आयोगका उपाध्यक्ष, नेपाली सेनाका प्रधानसेनापति लगायतको सहभागिता थियो ।

यही ३१ अक्टोबरमा जम्मू-कश्मीर र लद्दाख औपचारिक रुपमा केन्द्रशासित प्रदेश भैसकेपछि गएको शनिबार मात्र भारतले नयाँ राजनीतिक नक्सा जारी गरेको थियो । भारतले नयाँ नक्सामा नेपाली भूमिमा पर्ने कालापानी, लिपुलेक र लिम्पियाधुरा समेटेपछि नेपाली पक्षले लगातार विरोध गर्दै आइरहेको छ ।

नेपाल सरकारको तर्फबाट परराष्ट्र मन्त्रालयले पनि विज्ञप्ति जारी गर्दै कालापानी क्षेत्र नेपालको भएको र भारतको एकतर्फी निर्णय नमान्ने बताइसकेको छ । दुई देशको बीचमा देखिएको सीमा विवाद अन्त्य गर्न दुवै देशका मन्त्रीस्तरीय छलफल गर्ने सरकारले प्रतिबद्धता जनाइसकेको छ ।

यही सीमा विवादलाई लिएर सत्तारुढ दल नेपाल कम्युनिष्ट पार्टी (नेकपा) को विद्यार्थी संगठन अखिल नेपाल स्वतन्त्र विद्यार्थी युनियन (अनेरास्ववियू) ले आपत्ति जनाउँदै विरोध र्‍याली निकालिसकेको छ ।

त्यस्तै नेपाली कांग्रेसको विद्यार्थी संगठन नेविसंघले भारतीय दूतावास अघि भारतको नयाँ नक्सा जलाएको थियो । विभिन्न राजनीतिक दल लगायतले सीमा विवादलाई लिएर ‘ब्याक अफ् इण्डिया’ अभियान नै चलाएका छन् ।

अन्तिम अपडेट: पुस २७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्