अदालतलाई नटेरेको आरोपमा प्रहरी महानिरीक्षकसहित ४ जनाविरुद्ध मुद्दा दायर हुने

फागुन १७, २०७६ शनिबार १४:५५:६ | उज्यालो सहकर्मी

काठमाण्डौ - प्रहरी महानिरीक्षकसहित ४ जना प्रहरीविरुद्ध अवहेलनाको आरोपमा मुद्दा चलाउन सर्वोच्च अदालतले आदेश दिएको छ ।

बन्दी प्रत्यक्षीकरणको आदेश पाएर छुटेका विप्लव समूहका ३ जना कार्यकर्तालाई पटक-पटक अदालत परिसरबाट पक्राउ गरेर अदालतको अवहेलना गरेको भन्दै सर्वोच्चले प्रहरी महानिरीक्षकसहित ४ जनाविरुद्ध मुद्दा चलाउन आदेश दिएको हो ।

नेत्रविक्रम चन्द समूहका कार्यकर्ताहरू भीमप्रसाद अधिकारी, हरिचन्द्र खड्का र विष्णुप्रसाद अधिकारीलाई फागुन ५ गते अदालतले छोड्न आदेश दिँदा पनि फेरि पक्राउ गरेर हिरासतमा लिएको भन्दै प्रहरीविरुद्ध भीमप्रसाद शर्माले रिट दर्ता गर्नुभएको थियो ।

शर्माको रिटमा सुनुवाइ गर्दै न्यायाधीशद्वय ईश्वरप्रसाद खतिवडा र डम्बरबहादुर शाहीको संयुक्त इजलासले अदालतको मानहानी गरेकोले प्रहरी महानिरीक्षक, महानगरीय प्रहरी वृत्त सोह्रखुट्टेका प्रमुख, महानगरीय प्रहरी परिसर टेकुका प्रमुख र महानगरीय प्रहरी वृत्त सिंहदरबारका प्रमुखविरुद्ध अदालतको अवहेलनामा मुद्दा दर्ता गर्न सर्वोच्चका रजिष्ट्रारको नाममा आदेश दिएको हो ।

प्रहरीले अदालतको आदेशलाई अटेर गरेको र यो ज्यादै अशोभनीय भएको सर्वोच्चको ठहर छ । सर्वोच्चको आदेशअनुसार रजिष्ट्रारले प्रहरी महानिरीक्षकसहित ४ जनाविरुद्ध अदालतको अवहेलनाको मुद्दा अगाडि बढाउनुपर्ने छ ।

सर्वोच्चले प्रहरी महानिरीक्षक ठाकुर ज्ञवाली, महानगरीय प्रहरी परिसर टेकुका प्रमुख प्रहरी वरिष्ठ उपरिक्षक उत्तमराज सुवेदी, महानगरीय प्रहरी वृत्त सिंहदरबारका प्रमुख प्रहरी नायव उपरीक्षक कौशल बुढाथोकी र महानगरीय प्रहरी वित्त सोह्रखुट्टेका प्रमुख प्रहरी नायव उपरीक्षक सन्तोषसिंह राठौरलाई अदालतमा हाजिर हुन निर्देशन समेत दिएको छ ।

अन्तिम अपडेट: माघ ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्