मलेसियामा २० नेपालीमा कोरोना सङ्क्रमण, घर फर्कन २६ सयको आवेदन

वैशाख २६, २०७७ शुक्रबार १८:४८:१५ | उज्यालो सहकर्मी

काठमाण्डौ – मलेसियामा २० जना नेपाली श्रमिकमा कोरोना सङ्क्रमण देखिएको छ । मलेसियामा रहेको नेपाली दूतावासका द्वितीय सचिव प्रतिक कार्कीका अनुसार शुक्रबारसम्ममा मलेसियामा २० जना नेपालीमा कोरोना सङ्क्रमण देखिएको हो ।

उहाँकाअनुसार सङ्क्रमितमध्ये तीन जना निको भएका छन् । अरुको स्वास्थ्य अवस्था सामान्य रहेको र मलेसियन सरकारले नै सङ्क्रमितको उपचार गरिरहेको पनि कार्कीले बताउनुभयो ।

‘पछिल्लो समय सुरक्षा गार्डमा पनि सङ्क्रमण भएको भन्ने कुरा आएको छ, तर दूतावासमा आधिकारिक जानकारी आएको छैन’ उहाँले भन्नुभयो, ‘अहिले दूतावासमा जानकारी आएअनुसार २० जना नेपालीमा कोरोना सङ्क्रमण देखिएको छ ।’

बिहीबार साँझ मलेसियन सञ्चारमाध्यम द स्टारले त्यहाँको स्वास्थ्य मन्त्रालयलाई उद्धृत गर्दै त्यहाँको एक मलमा ९ जना नेपाली सुरक्षा गार्डमा कोरोना सङ्क्रमण देखिएको जनाएको थियो ।

घर फर्कन २६ सयको आवेदन

दूतावासले अनलाइनमार्फत सङ्कलन गरेको तथ्याँकअनुसार शुक्रबारसम्म २६ सय जनाले घर फर्कन पाउँ भन्दै आवेदन दिएका छन् । द्वितीय सचिव कार्कीका अनुसार दूतावासले अनलाइनमार्फत आफ्नो विवरण भर्न भनेकोमा शुक्रबारसम्ममा २६ सय जनाले फारम भरेका हुन ।

कोरोनाका कारण कुनै समस्या भएमा अनलाइनमार्फत विवरण भरी आफ्नोबारेमा जानकारी दिन उहाँले अनुरोध गर्नुभएको छ । घर फर्कन नचाहनेले पनि आफ्नो समस्या टिपाउन सक्नेछन् ।

सबै जनाले आफूलाई परेको समस्या दूतावासमा राखेमा कसलाई के समस्या परेको छ भन्ने जानकारी दूतावासलाई हुने र पछि समन्वय गर्न सजिलो हुने कार्कीको भनाई छ ।

भिसा सकिएकाहरु स्वदेश फर्कन पाउने

जनवरी १ देखि भिसा सकिएर मलेसियामा ओभरस्टे भएकाहरु त्यहाँ लकडाउन सकिएको १४ दिनभित्र स्वदेश फर्कन पाउनेछन् । मलेसियाले त्यहाँको लकडाउन सकिएको १४ दिनभित्र फर्कन सक्ने बताए पनि नेपालमा लकडाउन नखुल्दा नेपाली श्रमिकले यो समयमा नेपाल फर्कन पाउने या नपाउने भन्नेबारे कुनै निर्णय भएको छैन ।

मलेसियामा मे १२ अर्थात वैशाख ३० गतेसम्म लकडाउन छ । नेपालमा जेठ ५ गतेसम्म थप्दै जेठ १८ गतेसम्म अन्तर्राष्ट्रिय उडान रोक्ने निर्णय भएको छ । यसकारण मलेसियामा मे १२ पछि लकडाउन लम्बिएन भने पनि जेठ १८ गतेसम्म नेपालमा अन्तर्राष्ट्रिय उडान नहुने भएकाले ओभरस्टे भएर बसेकाहरु यस अवधिमा फर्कन सक्ने सम्भावना कम छ ।

यसैबीच नेपाली श्रमिकलाई पर्ने असर र फर्कनुपर्ने बाध्यता लगायतका विषयमा सम्बन्धित मन्त्रालयलाई जानकारी गराइएको मलेसियामा रहेको नेपाली दूतावासले जाएको छ । यो समयमा भिसा सकिएर ओभरस्टे भएकाले स्वदेश फर्कंदा कुनै जरिवाना तिर्नु पर्दैन ।

मलेसियामै बस्न चाहने तर भिसा नवीकरण गर्नुपर्नेले भने लकडाउनको अवधि सकिएको एक महिनाभित्र मलेसियाको अध्यागमन कार्यालयमा गएर भिसा नवीकरण गर्न सक्नेछन् । यसरी भिसा नवीकरण गर्दा आफ्नो कम्पनीको आधिकारिक प्रतिनिधिलाई जानकारी गराउनुपर्नेछ ।

जनवरी १ भन्दाअघि नै भिसा सकिएर वा विभिन्न कारणले गैरकानुनी हिसाबले मलेसियामा बसिरहेका श्रमिक भने यो समयमा स्वदेश फर्कन पाउने छैनन् । पहिलेकै नियम अनुसार तोकेको जरिवाना र सजाय भोग्नपर्ने हुन्छ ।

यसरी अवैधानिक हुनेले मलेसियाको अध्यागमन नियमअनुसार बढीमा ३१ सय रिंगिटसम्म जरिवाना तिर्नुपर्छ । अदालत र कानुन अनुसार जेल सजाय पनि हुन सक्छ ।

लकडाउन अवधिको तलब दिनेबारे मलेसियन सरकार मौन

दूतावासका द्वितीय सचिव कार्कीका अनुसार मलेसियाले आफ्ना नागरिकलाई लकडाउनको समयमा सरकार र विभिन्न निकायको समन्वयमा अनुदानको घोषणा गरे पनि विदेशी नागरिकलाई त्यो अनुदान कार्यक्रममा समावेश गरेको छैन ।

कतिपय श्रमिकले पारिश्रमक नपाएको विषयमा आएको गुनासो लिएर रोजगारदातासँग कुरा गर्दा पुरै पारिश्रमिक दिन नसकिनेसम्मको प्रतिक्रिया पाएकोपछि मलेसियाको मानव संशाधन मन्त्रालयलाई यसबारे पत्राचार गरिएको दूतावासले जनाएको छ ।

श्रमिकलाई पूरा तलब दिलाउनका लागि दूतावासले निरन्तर समन्वय गरिरहेको कार्कीको भनाइ छ । खान बस्न लगायत आफूलाई परेका समस्या हटलाइनमार्फत टिपाउन पनि दूतावासले अनुरोध गरेको छ । श्रमिकलाई परेका समस्या समाधानमा प्रयास गरिरहेको दूतावासको भनाइ छ ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्