टिकट कम्पनीले दिएन, पासपोर्ट साथमा छैन, कहिलेसम्म आफ्नै खर्चमा बसौं ?

असार ११, २०७७ बिहीबार ११:१४:२० | मेरो कथा मेरो भोगाई

गोबिन्द घिमिरे,अर्घाखाँची/हाल मलेसिया ।

म मलेसिया आएको तीन वर्ष भयो । तर यो तीन वर्षमा कहिल्यै भोग्न नपरेको सास्ती र समस्या यही कोरोना महामारी सुरु भएको तीन महिनामा भोग्न पर्‍यो । सामान्य अवस्थामा काम र कमाइ चल्दासम्म त ठिक रहेछ परदेश । तर जब सानो नै किन नहोस् समस्या भएपछि न परदेशी कम्पनीले सहयोग गर्दोरहेछ, न त हाम्रो दूतावासले नै । मैले अहिले भोगेको समस्या पनि यही हो ।

मेरो भिसा सकिन एक महिना बाँकी थियो । कम्पनीले सोध्यो, ‘घर जाने कि काम गर्ने ?’

मैले सोचेँ, तीन वर्ष काम गरिसकें अब घर जान्छु । त्यसैले कम्पनीलाई घर जान्छु भनें । मैले घर जान्छु भनेपछि कम्पनीले मलाई काम दिन छाड्यो । काम नभएपछि तीन महिनादेखि कोठामै बसिरहेको छु ।

कोठामा बस्दाको खर्च पनि आफ्नै निजी हो । कम्पनीले दिएको छैन । भयो के भने मेरो काम बन्द हुनु र कोरोना महामारीले उडानहरु बन्द हुनु एकैपटक जस्तो भयो । त्यसैले म चुपचाप बस्नु बाहेक बिकल्पै रहेन । तर पनि घर जान पाइन्छ भन्ने आश थियो ।

त्यही क्रममा समस्यामा पर्ने र घर फर्कन चाहनेले विवरण भर्न भनेर दूतावासले सूचना जारी गर्‍यो । मैले दूतावासको अनुरोध अनुसार नै तीन पटकसम्म फारम भरेँ । सरकारले तोकेको प्राथमिकता अनुसार घर फर्कनेको प्राथमिकताको सूचीमा मेरो नाम पनि निस्कियो । तर घर जान पाइने भइयो भनेर म खुशी हुन सकिनँ । मलाई झन समस्या भयो ।

सरकारले तोकेको र नेपालीलाई लैजान नेपालबाट आउने चार्टर्ड उडानको भाडाले मलाई समस्या पर्‍यो । मेरो नाम प्राथमिकतामा परेपछि कम्पनीसँग टिकटको बारेमा कुरा गरेँ । तर कम्पनीले महंगो भएकाले टिकट नदिने भन्यो । त्यसो भए मेरो पासपोर्ट र चेकआउट मेमो (घर फर्कने अनुमति) दिनुस् न त भनेँ । तर कम्पनीले हुँदैन भन्यो ।

दूतावास घर फर्कन चेकआउट मेमो र पासपोर्ट लिएर आउ भन्छ । कम्पनीले दिँदैन । दूतावासलाई भने, मलाई कम्पनीले यस्तो गर्‍यो, म आफ्नै पैसामा घर फर्कन चाहन्छु मेरो पासपोर्ट र चेकआउट मेमो निकालिदिनुस् । तर दूतावासले यो अवस्थामा सकिँदैन भन्छ ।

अहिले मलेसियाबाट नेपालीहरु घर गइरहेका छन् । तर म भने घरबाट पैसा मगाएर आफैं जान्छु भन्दा पनि पाएको छैन । दूतावासले त्यति सहयोग पनि गरेन । अहिले त दिनमा निकै पटक फोन गर्छु तर उठ्दैन । न काम छ न कमाइ । आफ्नै पैसाले पेट पाल्न परेको छ । घरबाट पैसा मगाएर फर्कन्छु भन्दा पनि साथमा पासपोर्ट छैन । यसरी कहिलेसम्म परदेशमा बसौं सरकार ?

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्