थाहा नगरकी पौरखी महिला, २ सय रोपनी जग्गामा ४ हजार किवीका बोट

कात्तिक १५, २०७७ शनिबार १९:३७:९ | हरि हुमागाईं

मकवानपुर – थाहा नगरपालिका–४, ठूलो मार्खुकी बरीबल तामाङको बारीमा किवी लटरम्मै फलेर झुलेका छन् । उहाँको बारीमा किवीसँगै तरकारी पनि देख्न पाइन्छ । ३४ वर्षीया बरीबल त्यही बारीमा कहिले किवी त कहिले तरकारी गोडमेल गर्दैै, झार हटाउँदै गरेको भेटिनुहुन्छ ।

बरीबलले एकल प्रयासमा तरकारी र फलफूल खेती गरेको देख्दा वरपरका गाउँले समेत चकित परेका छन् । आफ्नो एक्लैको प्रयासले किवी र तरकारी खेती गरेको उहाँ गर्वका साथ बताउनुहुन्छ ।

पाँच वर्ष अगाडि थाहा पौरखी कृषि प्रालि फर्म दर्ता गरेर उहाँले महिलाहरुले पनि चाहेमा उद्यम गर्न सक्छन् भन्ने उदाहरण बन्नु भएको छ । उहाँले गर्नुभएको किवी खेतीका लागि वाग्मती प्रदेशको भूमि व्यवस्था, कृषि तथा सहकारी मन्त्रालय अन्तर्गतको कृषि विकास निर्देशनालय हेटौंडाले सहयोग गरेको छ । भिरालो जमिनमा सिंचाइ गर्नका लागि थप समस्या हुने भएपछि लिफ्ट सिंचाइका लागि सहयोग गरिएको निर्देशनालयका निर्देशक रबिन्द्र बहादुर प्रधानले बताउनुभयो ।

‘बरीबल तामाङ्ले निकै मेहनतका साथ काम गरेको र सफल देखिएकाले उहाँलाई सहयोग गरिएको हो’, प्रधानले भन्नुभयो । लिफ्ट सिंचाइका कारण पानीको समस्या भने अहिले हटेको छ । राम्रो काम गर्ने र मेहनत गर्ने किसानका लागि लिफ्ट सिंचाइ प्रदान गरिएको प्रधानले बताउनुभयो ।

तामाङले सुरुमा ५० बोट किवी लगाएर सुरु गर्नुभयो र त्यसबाट राम्रो आम्दानी भएपछि थप किवी खेती गर्नुभएको हो । अहिले उहाँको बारीमा लगाइएका किवीबाट राम्रो उत्पादन भइरहेको छ । ८ वर्ष पुरानो किवीको एउटा बोटमा वर्षको ४० किलो सम्म फल्ने गरेको उहाँको भनाइ छ । अहिले बरीबलको बारीबाट किवी प्रतिकिलो २ सय देखि २ सय ५० सम्ममा बिक्री हुने गरेको छ ।

उहाँको बारीमा हेवार्ड, बरुनो र एलिसन लगायतको जातको किवीका बोटहरु छन् । दुईसय सय रोपनी जग्गामा ४ हजार किवीको बोट रोप्नुभएको छ । सबै बोटमा किवी फल्न सुरु भएको उहाँले बताउनुभयो । किवीको बोट सानो भएकोले त्यसको वरिपरि मुला र लसुन पनि रोप्नुभएको छ ।

उहाँका अनुसार किवी तथा तरकारी खेतीमा करिब १ करोड ५० लाख रुपैयाँ व्यक्तिगत लगानी लागेकाे छ । लिफ्टिङ सिंचाइको लागि वाग्मती प्रदेश सरकारको ३५ लाख अनुदान प्राप्त भएको र यसले धेरै सहयोग पुगेको उहाँको भनाइ छ । कृषि विकास निर्देशनालय हेटौंडाले दिएको लिफ्टिङ सिंचाइले किवी र तरकारी खेतीको लागि निक्कै सजिलो भएको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हरि हुमागाईं

मकवानपुरका उज्यालो सहकर्मी हरि हुमागाईं नेपाल पत्रकार महासंघको पूर्व जिल्ला अध्यक्षसमेत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्