संखुवासभामा औंसा किराका कारण सुन्तलाकाे उत्पादन घट्यो (फोटो फिचर)

पुष १४, २०७७ मंगलबार १४:५१:५८ | नवीन गुरुङ

संखुवासभा - संखुवासभामा यो वर्ष सुन्तलामा औंसा किरा परेपछि उत्पादन घटेकाे छ ।

औंसा किराका कारण सुन्तला बोटमा नपाकी झर्ने गरेको कृषकहरुको गुनासो छ । साथै फूल फुल्ने समयमा अत्याधिक वर्षा भएका कारण फूल झरेकाले बोटमा दाना कम बसेको खाँदबारी-४ का प्रमोद राईले बताउनुभयो ।

उहाँले सुन्तलाको उत्पादन घटे पनि मूल्य भने बढेको बताउनुभयो । ‘मेरो बगानमा १४/१५ बोट सुन्तला छ । गएको वर्ष ४० हजार रुपैयाँमा बगान नै ठेक्का दिएको थिए । तर यो वर्ष सुन्तला कम फलेकाे छ । खुद्रा बिक्री गर्ने योजना छ ’राईले भन्नुभयो ।

यो वर्षको सुन्तला गएको वर्षहरुको जस्तो रसिलो नभएको र बोटबाट अत्याधिक झरेको राईको भनाइ छ । संखुवासभाकाे खाँदबारी-४ को गैरीपांमा, लोकेपांमा, डाँडा, सेकाहाको तल्लो भेग, खाँदबारी-५ को माल्टा, पाङ्ठा र लेलुवालगायतको ठाउँहरुमा सुन्तला उत्पादन हुने गरेको छ ।

त्यसैगरि सिलिचोङ गाउँपालिकाको माङ्तेवा, याफ', चैनपुर नगरपालिका र मादी नगरपालिकाभित्रका विभिन्न ठाउँलाई सुन्तला उत्पादनका लागि प्रख्यात मानिन्छ । तर यी सबै ठाउँहरुमा सुन्तलामा औंसा किरा लागेपछि उत्पादन घटेको हो । बिहान बगान पुग्दा भुइँ भरि सुन्तला आफैँ झरेको भेटिने गरेको कृषकहरुको गुनासो रहेकाे छ ।

तर, अघिल्लो वर्ष मंसिर, पुस र माघको समयमा प्रतिकेजी ८० देखि ९० रुपैयाँमा पाइने सुन्तला अहिले प्रतिकेजी १ सय ५० रुपैयाँसम्म पर्ने गरेको छ । सुन्तलाको उत्पादन घटेका कारणले यस वर्ष मूल्य बढेको खाँदबारी-४ गैरीपांमाका अर्का स्थानीय कृषक प्रताप राईले बताउनुभयो ।

‘सुन्तलाको फूल खेल्ने समयमा हावा बतास लाग्यो, हावाले फूल झारेपछि फल लागेन । त्यसमाथि झन किराले फुलै खाएपछि सुन्तला नै फलेन’ स्थानीय कृषक राईले भन्नुभयो । संखुवासभाभित्रका अधिकांश ठाउँबाट सुन्तलामा किरा लागेको गुनासो आएपछि स्थलगत रुपमा गएर अवलोकन गरेको र सुन्तलाको दानाभित्र औंसा किरा भेटिएको कृषि ज्ञानकेन्द्र संखुवासभाका प्रमुख गोविन्द आचार्यले बताउनुभयो ।

उहाँको अनुसार, गएको वर्षदेखि सुन्तलामा औंसा किरा देखिन थालेको छ । यसको न्यूनीकरणका लागि विभिन्न पहल गरिरहेको छ । औंसा किराले सुन्तलाको केस्रा खान थालेपछि बोटमा नपाकी झर्ने गरेकाे कृषि केन्द्र प्रमुख आचार्यको भनाइ छ ।

जिल्ला कृषि ज्ञानकेन्द्र संखुवासभाको तथ्याङ्कअनुसार, आर्थिक वर्ष ०७५/७६ मा एक हजार ३ सय ८७ मेट्रिकटन र आर्थिक वर्ष ०७६/७७ मा एक हजार ७ सय ९२ मेट्रिकटन सुन्तला उत्पादन भएको देखिन्छ । रोग, औंसा किराको प्रकोप र असिना पानीका कारण यस वर्ष सुन्तला उत्पादन घटेको ज्ञानकेन्द्रको भनाइ छ ।

औंसाको प्रकोप बढेपछि सबै चिन्तित

संखुवासभामा गएको वर्षदेखि सुन्तलामा औंसा किरा देखिएपछि कृषकका साथै सरोकारवाला निकाय कृषि ज्ञानकेन्द्र र सुन्तला कार्यक्रमका पदाधिकारीहरु समेत चिन्तित बनेका छन् । सुन्तलामा औंसा किराको प्रकोप बढेपछि काठमाण्डौबाट विज्ञ समूहका टोली केहीदिन अगाडि राष्ट्रिय सुन्तला जात अनुसन्धान कार्यक्रमका प्राविधिक टोली संखुवासभा आउनुभएको थियो ।

राष्ट्रिय सुन्तला जात अनुसन्धान कार्यक्रमका प्रमुख तथा वैज्ञानिक डा. उमेशकुमार आचार्य र वैज्ञानिक रोशन रोक्का संखुवासभा आउनु भएको कृषि ज्ञानकेन्द्र संखुवासभाका प्राविधिक सहायक सरोज रायले जानकारी दिनुभयो ।

उहाँका अनुसार, विज्ञ टोलीले खाँदबारी-४ गैरीपांमा रहेको कृषकहरुको बगानमा पुगेर सुन्तलाको अनुगमन र अध्ययन गरेकाे थियो । जिल्ला प्राविधिक टोली सुन्तला उत्पादन हुने सबै ठाउँमा पुगेर औंसाका बारेमा अध्ययन गरिएको उहाँले जानकारी दिनुभयो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्