भीम रावललाई लेखराज भट्टकाे सुझाव : सामाजिक सञ्जालमा हाेइन समितिमा मत राख्नुस्

कात्तिक २३, २०७८ मंगलबार १८:१६:५० | उज्यालो सहकर्मी

काठमाण्डाै – नेकपा एमालेका सुदूरपश्चिम प्रदेश इन्चार्ज लेखराज भट्टले एमाले उपाध्यक्ष भीम रावललाई सामाजिक सञ्जालमा नभइ समितिको बैठकमा मत राख्न सुझाव दिनुभएको छ ।

आज मङ्गलवार बिहान एमाले उपाध्यक्ष रावलले सामाजिक सञ्जाल ट्वीटरमा एक ट्वीट गर्दै सुदूरपश्चिम प्रदेश कमिटीको बैठकप्रति आपत्ति जनाएपछि प्रदेश इन्चार्ज भट्टले सामाजिक सञ्जालमा नभइ समितिको बैठकमा मत राख्न सुझाव दिनुभएको हो । एमाले सुदूरपश्चिमको बैठकलाई सम्बोधन गर्ने क्रममा इन्चार्ज भट्टले रावललाई फरक मत राख्नलाई पार्टीमा समितिहरू रहेको बताउँदै सामाजिक सञ्जालमा नौट्ङकी नदेखाउन पनि चेतावनी दिनुभयो ।

प्रदेश इन्चार्ज भट्टले भन्नुभयो, ‘नेपाली राजनीतिमा हिजोको दिनमा मर्यादित, सुव्यवस्थित, सम्मानजनक ढङ्गले जाने र आफ्ना मतलाई व्यक्त गर्ने कमिटी प्रणाली छ । सङ्गठनात्मक कमिटी प्रणालीबाट हामीले हरेक समस्या, विचार, भिन्न मतलाई छलफल र समाधान गर्दै आएका छौँ । कसैलाई चित्त बुझेन भने मैले भनेको हुनुपर्छ, नत्र म आउँदिन भन्ने, उपस्थित हुन्न भन्ने, राजीनामा दिन्छु भन्ने, यी खालका अभिव्यक्तिहरू आउँछन् । पार्टी म विना हुँदैन भन्ने चिन्तन गलत छ । व्यक्ति नभए पनि पार्टी चल्छ, देश चल्छ र जीवन चल्छ । यहाँ त निर्माण गरेकोलाई ध्वंस गर्ने काम भइरहेको छ, अहिलेको हाम्रो लक्ष्य र उद्देश्य निर्माण हो, एकता हो र हामीले पार्टीले लिएको नीति र व्यक्तित्वले लिएको दर्शन के हो त ? समृद्ध नेपाल र सुखी नेपाली आम समाजवादतिर कसरी लैजान सकिन्छ भन्ने हो ।’

एमाले उपाध्यक्ष रावलले आज बिहान ट्वीट गर्दै सुदूरपश्चिम प्रदेश कमिटीको बैठकप्रति आपत्ति जनाएपछि नेकपा एमाले सुदूरपश्चिमका अध्यक्ष कर्ण थापाले पार्टीको असन्तुष्टिलाई नागरिक र कार्यकर्ताको बीचमा लैजानुले पार्टीलाई फाइदा नहुने बताउनुभयो । उहाँले असन्तुष्ट विचारले अन्य पार्टी विपक्षीहरूलाई मात्र खुसी बनाउने बताउनुभयो ।

नेकपा एमाले कैलालीको पार्टी कार्यालयमा उपाध्यक्ष रावलको अनुपस्थितिमा प्रदेश कमिटीको पूर्ण बैठक चलिरहेको छ । पूर्ण बैठकमा प्रदेश अध्यक्ष थापाले सुदूरपश्चिममा एमाले अधिवेशन शान्तिपूर्ण ढङ्गले सम्पन्न भएको बताउनुभयो ।

बैठकमा प्रदेश इन्चार्ज लेखराज भट्ट, सह–इन्चार्ज नारदमुनि राना, निरु पाल, प्रदेश अध्यक्ष कर्ण थापा, सचिव राजेन्द्रसिंह रावललगायत नेताको उपस्थिति रहेको छ ।

अन्तिम अपडेट: पुस २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्