अर्घाखाँचीमा पानीका मुहान बचाउन 'रिचार्ज पोखरी'

पुष २०, २०७८ मंगलबार २०:०:४८ | प्रेमनारायण आचार्य

अर्घाखाँची – झन्डै तीन वर्षअघि सन्धिखर्क नगरपालिका ९ अर्घामा रहेको काफलपानी पँधेरो सुक्यो । त्यस ठाउँका ५० घरले पिउने पानी प्रयोग गर्ने पधेँरो हिउँदमा सुकेपछि टाढाको अर्को पँधेरोबाट पानी खान स्थानीयवासी बाध्य भए ।

रोजगारी र अध्ययनको सिलसिलामा युवायुवती गाउँमा नबसेपछि घरमा रहेका वृद्धवृद्धालाई निकै सास्ती भयो । तर गएकाे वर्ष ठूलो खडेरी लाग्दा समेत पानी नसुकेपछि स्थानीयवासी खुसी भएका छन् ।

युवा समाजसेवी तथा व्यवसायी कृष्णप्रसाद भुसाल र पत्रकार हरिप्रसाद भुसालको नेतृत्वमा सुरु भएको दश घर एक पोखरी अभियानले दुई वर्षअघि काफलपानी पँधेरो भन्दा माथि नेटाका पोखरामा पोखरी खनेपछि काफलपानी पँधेराको पानी नसुकको हो ।

पानी पँधेरो खडेरीमा पनि नसुकेपछि आफूहरू खुसी भएको स्थानीयवासी जीवबहादर दमाइले बताउनुभयाे । उहाँले भन्नुभयाे, ‘दुई/तीन वर्षअघि सामान्य खडेरीमा पनि सुक्न थालेको पँधेरो यो पोखरी खनिएपछि गएकाे वर्ष ठूलो खडेरीमा पनि सुकेन ।’

नेटाका पोखरा मात्र होइन दुई वर्षअघि सुरु भएको दश घर एक पोखरी अभियानले अर्घाखाँची जिल्लाका विभिन्न ठाउँमा साना–ठूला गरी ४० भन्दा बढी पोखरी निर्माण गरिएकाे थियो ।

आफूहरूले खनेका पोखरीका कारण धेरै ठाउँमा हिउँदमा पनि पानी नसुकेको रिचार्ज पोखरी निर्माण अभियानका अभियन्ता कृष्णप्रसाद भुसालको भनाइ छ । ‘त्यतिबेला विभिन्न व्यक्तिको झन्डै एक लाख रुपैयाँकाे सहयोगमा विभिन्न ठाउँमा पोखरी निर्माण गरिएको थियो । बढ्दो जलवायु परिवर्तनका कारण पानीका मुहान सुक्दै जान थालेकोाले पानीको मुहान संरक्षण गर्न हामीहरूले अभियान सुरु गरेका हाैँ’, उहाँले भन्नुभयाे ।

दुई वर्षअघि खनेका पोखरीले खडेरीमा समेत मूल मर्न नदिएको देखेपछि हौसिएका अभियन्ताहरूले गएको तिहारमा लायन्स क्लब अफ अर्घाखाँचीसँग समन्वय गरी देउसी–भैलोबाट उठेको पैसाबाट पनि रिचार्ज पोखरी खनिरहेका छन् । दश घर एक पोखरी अभियानले जिल्लाका विभिन्न ठाउँमा पोखरी निर्माण गरिरहेको छ । पाँच वटा पोखरी खनिसकेको र अझै पाँच वटा पोखरी खन्ने काम भइरहेकाे भुसालको भनाइ छ ।

विकासका क्रममा बाटो, खेल मैदान अनि संरचनाहरू निर्माण हुँदा धेरै ठाउँमा पोखरी पुरिएको र पोखरी पुरिएकै कारण अर्घाखाँचीमा पानीको समस्या झन् बढेको निष्कर्षसहित दश घर एक पोखरी अभियानको सुरु भएको थियो ।

अन्तिम अपडेट: मंसिर २०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रेमनारायण आचार्य

प्रेमनारायण आचार्य अर्घाखाँची उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्