बझाङमा पालिकाका एम्बुलेन्स थन्किए, जनप्रतिनिधि चढ्ने गाडी सधैँ सञ्चालनमा

कात्तिक १९, २०७९ शनिबार ८:०:९ | डीबी बिष्ट

बझाङ - बझाङमा पालिकाले सञ्चालन गर्दै आएका एम्बुलेन्स लामो समयदेखि थन्किँदा बिरामीहरुलाई अस्पताल पुग्न समस्या भएको छ । कसैले नि:शुल्क त कसैले सस्तो दरमा बिरामी बोक्ने भन्दै एम्बुलेन्स सेवा सुरु गरेको भए पनि लामो समयदेखि एम्बुलेन्स थन्किएका छन् ।

अस्पतालले बिरामी रेफर गरेको पाँच दिनसम्म एम्बुलेन्स नपाएको तर गाउँपालिकाको एम्बुलेन्स थन्किएको केदार स्युँ गाउँपालिका वडा नम्बर ५ का कृष्णबहादुर गुर्धामीले बताउनुभयो । पाँच दिनअघि जन्मेको उहाँको बच्चालाई उपचारको लागि धनगढी अस्पताल लैजान जिल्ला अस्पताल बझाङले रेफर गरेको चार दिन भयो ।

अक्सिजनसहित लैजानुपर्ने भएकाले जीपमा लैजान नसकिएको गुर्धामीले बताउनुभयो । जिल्लाका सबै पालिकामा रहेका एम्बुलेन्स चालकदेखि त्यहाँका जनप्रतिनिधिहरुलाई खबर गरेकोमा कतै चालक नभएको र कतै एम्बुलेन्स बिग्रिएको बताउने गरेका उहाँले गुनासो गर्नुभयो ।

बझाङमा नौ वटा एम्बुलेन्स छन् । तर तीमध्ये जिल्ला अस्पतालका दुई वटा मात्रै सञ्चालनमा छन् । केदार स्युँ गाउँपालिकाको एम्बुलेन्स बिग्रिएको एक वर्ष भयो । छविसपाथिभेरा गाउँपालिकाको एम्बुलेन्स प्रयोगविहीन भएको महिनौँ भयो । मस्टा गाउँपालिकाले चालक नभएको भन्दै एम्बुलेन्स थन्काएको छ ।

तल्कोट गाउँपालिका, दुर्गाथली गाउँपालिका, बुङ्गल नगरपालिकामा रहेका एम्बुलेन्स पनि थन्किएका छन् । पालिकाका जनप्रतिनिधिले चढ्ने गाडी बिग्रिएमा तत्काल मर्मत गर्ने र चालक पनि सधैँ तयारी अवस्थामा हुने गरेको भए पनि एम्बुलेन्स बिग्रिएपछि मर्मत नगर्ने र चालक नभएको बहाना पार्ने गरेको स्थानीय बताउँछन् । जिल्ला अस्पतालमा कार्यरत डाक्टर मिलन खड्काले पालिकाले खरिद गरेका एम्बुलेन्सले बिरामीलाई सेवा नदिएको बताउनुभयो ।

अन्तिम अपडेट: मंसिर २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्