६ दशकसम्म पनि बनेन पिंगुवा सिंचाई आयोजना

कात्तिक ७, २०७५ बुधबार ८:५७:४१ | प्रकाश धौलाकोटी

तेह्रथुम – निर्माण सुरु भएको ६ दशक बित्न लाग्दासमेत तेह्रथुमको म्याङलुङ नगरपालिकामा निर्माणाधीन पिंगुवा सिंचाई आयोजना निर्माणको काम पूरा भएको छैन ।

वि.स. २०१५ सालमा तत्कालीन सांसद तेजमान तुम्बाहाम्फेको पहलमा सुरु भएको सो आयोजना अहिलेसम्म पनि निर्माण सम्पन्न भएको छैन । तत्कालीन समयमा जिरिखिम्ती, साब्ला, पिप्ले, म्याङलुङ र तम्फुला गरी पाँच गाउँलाई सिंचित गर्न निर्माण थालिएको आयोजना पूरा नहुँदा आयोजना बन्ला र गाउँमै सिंचाईको सुविधा होला भन्ने आशाले बसेका सर्वसाधारण निराश बन्न थालेका छन् ।

कुटो कोदालोको भरमा गाउँलेले शुरु गरेको पिंगुवा सिंचाई आयोजना निर्माणको काम आयोजना स्थलका बासिन्दाको विरोधका कारण निर्माण हुन नसकेको हो । पिंगुवा खोलाबाट झण्डै १८ किमी दूरीमा पानी ल्याएर सिंचाई गर्ने सो आयोजनाको निर्माणका लागि पाँच वर्षअघि तत्कालीन सिंचाई मन्त्री एनपी साउदले पूरा गर्ने बचन दिनुभएको थियो ।

तर त्यसयता पनि आयोजना निर्माणको काम हुन सकेको छैन । कुनै बेला इटाली कुलोका नामले चर्चित यो आयोजनाका लागि २०४० सालमा इटाली सरकराले २ करोड रुपैयाँ सहयोग गरेको थियो । सो रकममध्ये एक करोड रुपैयाँ खर्च गरेर मुहानदेखि झण्डै ३ किलोमिटर टाढासम्म पक्की कुला समेत निर्माण गरिएको छ ।

तर पञ्चायती शासन व्यवस्था रहेको तत्कालीन अवस्थामा स्थानीयको विरोधपछि इटाली सरकारले आयोजनाबाट हात झिकेको थियो । ०४६ सालपछि देशमा बहुदल स्थापना भए पनि आयोजना निर्माणका लागि सरकारले पर्याप्त बजेट उपलब्ध गराएको छैन ।

यो अवधिमा केही बजेट विनियोजन हुने गरे पनि आयोजना स्थलका बासिन्दाको विरोधका कारण आयोजना निर्माणको काम अघि बढेको छैन । पछिल्ला चुनावहरुमा समेत राजनीतिक दल र नेताले आयोजना निर्माणलाई प्राथमिकतामा राख्ने बचन दिने गरेका छन् । तर अहिलेसम्म पनि आयोजना निर्माणको काम अघि बढेको छैन ।

सिंचाई आयोजना नबन्दा हाल म्याङलुङ नगरपालिकामा गाभिएका तत्कालीन पाँच गाउँ विकास समितिहरुमा सिंचाईको समस्या रहेको छ । त्यसमध्ये पनि नगरपालिकाको वडा नं. १ र २ मा भने सिंचाईको ठूलो समस्या रहेको छ ।

स्थानीय सरकार गठन भएपछि आयोजना बन्ने आशा पलाएको नगरवासीहरुको भनाई रहेको छ ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रकाश धौलाकोटी

उज्यालोका तेह्रथुम सहकर्मी प्रकाश धौलाकोटी रेडियो तेह्रथुममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्