विद्युत् विकास विभागको निर्देशन पछि लिखु–२ जलविद्युत् आयोजनाको सुरुङमा पानी पठाउन बन्द

जेठ १५, २०८० सोमबार १६:२५:० | उज्यालो सहकर्मी

काठमाण्डौ – विद्युत् विकास विभागको निर्देशनपछि लिखु–२ जलविद्युत् आयोजनाले सुरुङमा पानी पठाउन बन्द गरेको छ ।

परीक्षणका लागि झण्डै २० दिनअघि सुरुङमा पानी पठाएकोमा सुरुङको पानी चुहिएर बस्तीमा पसेपछि विभागले सुरुङमा पानी पठाउने काम बन्द गर्न निर्देशन दिए अनुसार आज बिहानदेखि पानी पठाउने काम बन्द गरेको रामेछापका प्रमुख जिल्ला अधिकारी अनिता निरौलाले जानकारी दिनुभयो ।

आयोजनाको सुरुङमा पठाएको पानी चुहिएर बस्तीमा पसेपछि रामेछापको उमाकुण्ड गाउँपालिकाको पेकरनास र कोरेमका ४२ घरधुरी जोखिममा परेका छन् ।

पीडितहरुले आफूहरुलाई स्थानान्तरण गर्नुपर्ने माग गर्दै आयोजनाको कार्यालयमा तालाबन्दीसमेत गरेपछि प्रमुख जिल्ला अधिकारी निरौला सहितको टोलीले स्थलगत अवलाेकन गरेको थियो ।

आफूहरुले स्थलगत अध्ययन गर्दा बस्तीमा पानी पसेको र जोखिम उच्च भएको देखिएपछि गृह मन्त्रालय र उर्जा, जलस्रोत तथा सिँचाइ मन्त्रालयलाई पत्र पठाएर सुरुङमा पानी पठाएर जाँच गर्न आग्रह गरेको प्रमुख जिल्ला अधिकारी निरौलाले बताउनुभयो ।

बस्ती उच्च जोखिममा रहेको पाइएकोले यसबारेमा थप छलफल गर्न भोलि जिल्ला विपद् व्यवस्थापन समिति रामेछापको बैठक बोलाएको र त्यहाँ थप छलफल गर्ने उहाँले बताउनुभयो ।

एम् भि दुगड कम्पनीले लिखुखोलामा निर्माण गरेको ५५ मेगावाट क्षमताको लिखुखोला–२ आयोजना निर्माण चरणको अन्तिममा पुगेको छ ।

सुरुवात देखि त्यहाँका जनतालाई विभिन्न कारण पीडित पार्दै आएको जलविद्युत् आयोजनाले पछिल्लो पटक बस्ती नै जोखिममा पारेको उमाकुण्ड गाउँपालिकाका अध्यक्ष शेरबहादुर सुनुवारले बताउनुभयो ।

अध्यक्ष सुनुवारले उर्जा मन्त्री शक्ति बहादुर बस्नेतलाई भेटेर सुरुङको पानी चुहिएको विषय समाधान गरेर मात्रै आयोजनाको थप काम अघि बढाउन अनुरोध गर्नुभएको छ ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्