ए डिभिजन लिगमा थ्रीस्टारको दोस्रो शानदार जित, 'कमब्याक' भएका बिक्रमले हाने एक गाेल

मंसिर २, २०७५ आइतबार १८:५५:४ | उज्यालो सहकर्मी

काठमाडौं – कप्तान बिक्रम लामाको कमब्याक शानदार बनाउँदै शहीद स्मारक ए डिभिजन लिगमा थ्रीस्टारले लगातार दोस्रो जित निकालेको छ । आइतबार थ्रीस्टारले ब्रिगेड ब्वाइजलाई पाँच एक गोलले हरायो ।

सातदोबाटोस्थित एन्फा मैदानमा भएको खेलमा थ्रीस्टारले आक्रामक फुटबल खेल्दै दसौं मिनेटमा नै अग्रता बनाएको थियो । ब्रिगेड ब्वाइजका दीपेन सिंहले डिबक्सभित्र थ्रीस्टारका निराजन खड्कालाई लडाएपछि पाएको पेनाल्टीमा रजिन धिमालले गोल गरेका थिए ।

पहिलो हाफमा थ्रीस्टारले एक शून्यको अग्रता बनायो । ३० औं मिनेटमा थ्रीस्टारले अर्को गोलको अवसर पाए पनि सदुपयोग गर्न सकेको थिएन । पहिलो हाफमा एक गोलको अग्रता बनाएको थ्रीस्टारले दोस्रो हाफमा चार गोल थप्दा एक गोल खायो ।

राष्ट्रिय टोलीका उदयमान स्ट्राइकर सुनील बलले ५१ औं मिनेटमा गरेको गोलले थ्रीस्टारको अग्रता २–० बनायो । तर ७५ औं मिनेटमा ब्रिगेड ब्वाइजका राजन तिवारीले गोल गरी अन्तर दुई एकमा झारे ।

त्यसपछिको १५ मिनेटमा थ्रीस्टारले तीन गोल थप्यो । ८४ औं मिनेटमा रञ्जन विष्ट, ८९ औं मिनेटमा निराजन खड्का र खेलको अन्तिम मिनेटमा ८ महिनापछि मैदानमा फर्किएका थ्रीस्टारका कप्तान बिक्रम लामाले गोल गरे ।

बुढा सुब्बा गोल्डकपका क्रममा खुट्टा भाँच्चिएर आराममा रहेका बिक्रम चोटमुक्त भएपछि मैदान फर्किएका छन् । दुई खेलबाट ६ अंक बनाएको थ्रीस्टार लिगको शीर्ष स्थानमा छ । समान खेलबाट समान अंक भए पनि मनाङ मस्र्याङदी दोस्रो स्थानमा छ ।

आइतबारै भएको अर्को खेलमा विभागीय टिम नेपाल पुलिस क्लब मच्छिन्द्रसँग गोलरहित बराबरीमा रोकिएको छ । सातदोबाटोस्थित एन्फा मैदानमा भएको खेलमा आक्रामक फुटबल खेलेको पुलिसले मछिन्द्रविरुद्ध गोल गर्न भने सकेन ।

पहिलो हाफमा पुलिसले तीन वटा राम्रो मौका पाए पनि मच्छिन्द्रका गोल कीपर दीप कार्की बाधक बने । खेलको दोस्रो हाफमा पनि पुलिसले आफ्ना आक्रमक रणनीतिलाई कायमै राखेको थियो तर पनि उसका हरप्रयासलाई मच्छिन्द्रले विफल पार्यो ।

जारी प्रतियोगितामा पुलिसको पहिलो बराबरी हो भने मच्छिन्द्रको दोस्रो बराबरी हो । बराबरीपछि पुलिसको दुई खेलबाट चार अंक भएको छ भने मच्छिन्द्रको दुई खेलबाट दुई अंक भएको छ ।

अन्तिम अपडेट: कात्तिक १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्