काठमाडौं – विभिन्न कम्पनी खडा गरेर नेपाली कामदारमाथि लिइएको चर्को शुल्कको सम्बन्धमा साउन ८ गते मलेसिया सरकारसँग औपचारिक छलफल हुने भएको छ । 

मलेसियाका मानव संसाधन मन्त्री एम कुलासेगरनले नेपाली दूतावास मलेसियामा बिहीबार अनौपचारिक भ्रमण गर्दा याे विषयमा छलफल भएकाे हाे । नेपाली कामदारबाट लिइएको चर्को शुल्कका विषयमा मलेसियाको गृह, परराष्ट्र र मानव संशाधन मन्त्रालयले सामुहिक अध्ययन गरिरहेको र यस विषयमा औपचारिक छलफल गर्ने टुङ्गो लागेको मलेसियाका लागि कार्यवाहक राजदूत खरेलले बताउनुभएको छ । 

भ्रमणका क्रममा मन्त्री कुलासेगरनले नेपालले मलेसियामा कामदार पठाउने सवालमा लिएको पछिल्लो निर्णयबारे चासो राख्नुभएको थियो । नेपाली कामदार मेहनती र इमान्दार भएको भन्दै नेपालको पछिल्लो निर्णय र अनुरोधलाई मलेसिया सरकरकाले गम्भीरताका साथ लिइरहेको कुलासेगरनले बताउनुभयो ।