काठमाण्डौ - आसन्न एभरेष्ट प्रिमियर लिग क्रिकेट इपीएलमा चितवन राइनोजबाट दक्षिण अफ्रिकाका अलराउण्डर जेम्स फुलर खेल्ने भएका छन् । 

इपीएलमा स्टार खेलाडीहरुको बाहुल्यता रहने भएको छ । ३० वर्षीय फुलरले टी २० मा अहिलेसम्म ९६ विकेट लिएका छन् भने उनको नाममा ३७ क्याच रहेको छ।

दायाँ हाते ब्याट्सम्यान तथा फास्ट बलर फुलरले सोमपाल कामी, ललित सिंह भण्डारी र कमलसिंह ऐरीसहित चितवनको टीम बलिङमा पनि बलियो देखिने छ ।

फुलरले इंग्ल्यान्डको मिडलएक्स, हाम्सायरबाट खेलिसकेका छन् । यस्तै सिंगापुर टीमका डेभिड हार्डहिटर पनि चितवन राइनाेजमा आवद्ध भएका छन् । बिग ब्यास लिग खेलिसकेका डेभिड हार्डहिटर ब्याट्सम्यान हुन् । इपीएल मार्च १४ देखि त्रिवि क्रिकेट मैदान कीर्तिपुरमा हुँदैछ ।