काठमाण्डौ - सरकारले घोषणा गरेको लकडाउनका कारण अधिकांश सरकारी कार्यालयहरु सुनसान देखिए पनि जिल्ला सरकारी वकिल कार्यालय काठमाण्डौमा भने विगतको भन्दा चाप बढेको छ । 

कोरोना महामारीको कारण अत्यावश्यक सेवा बाहेकका कार्यालयहरु बन्द रहे पनि सरकारी वकिल कार्यालयमा भने विगतको भन्दा कामको चाप बढेको हो । 

पक्राउ पुर्जी जारी गर्नुपर्ने, म्याद थप, बन्दी प्रत्यक्षीकरणका मुद्दाहरुको सुनुवाई लगायतका कामहरु लकडाउनको समयमा पनि जारी रहेको सरकारी वकिल कार्यालयका सह-महान्यायधिवक्ता हरिप्रसाद रेग्मीले बताउनुभयो ।

सर्वोच्च अदालतको पूर्ण इजलासले केही समयका लागि केही सेवाहरु बन्द गर्ने निर्णय गरेको थियो  । गएको चैत २८ गतेबाट अभियोग पत्र लिने निर्णय लिनेसँगै अन्य सेवाहरु सुरु भए पनि म्याद थपको विषयमा वैकल्पिक व्यवस्था हुन नसक्दा २० दिनदेखि थन्किएका १ सयभन्दा बढी मुद्दाहरु एकै दिन दर्ता गर्नुपर्ने बाध्यता आइलागेको उहाँले बताउनुभयो ।

सरकारले आफूहरुले दिने सेवालाई गम्भीर रुपमा नलिएको आरोप लगाउँदै सह-न्यायधिवक्ता रेग्मीले दिनदिनै आएर काम नगरे हदम्याद जाने, व्यक्तिले न्याय नपाउने र अभियुक्त छुटेर जाने सम्भावना रहेको बताउनुभयो ।