सिरिए फुटबलमा युभेन्टस, इन्टर मिलान र रोमा विजयी भएका छन् ।  रोनाल्डो प्रेरित युभेन्टसले नापोली माथि ३–१ को जित निकालेको हो ।

शनिबार रातिको खेलमा रोनाल्डो व्यक्तिगत गोल गर्न नसके पनि दुई गोल उनको सहयोगमा भएको थियो । १०औं मिनेटमा नापोलीका डी मेट्रिन्सले गाल गर्दै अग्रता दिलाएका थिए । तर युभेन्टसले २६औं मिनेटमा बराबरी गोल गरेका थिए ।

क्रिष्टियानो रोनाल्डोले प्रहार गर्दा रिबाउन्स भएको बललाई मारियो मान्डुकिजले गोल गर्दै युभेन्टसलाई बराबरीमा ल्याएका थिए । यसैगरी मान्डुकिजले ४९औं मिनेटमा ब्यक्तिगत दोस्रो गोल गर्दा युभेन्टस २–१ ले अघि बढेको थियो ।

निर्धारित समय सकिन १४ मिनेट बाँकी रहेका बेला लियोनार्दो बुन्सिले युुभेन्टसका लागि गोल गर्दै खेलको नतिजा ३–१ बनाएका थिए । जारी सिजनमा युभेन्टस अपराजित रहँदै २१ अंक सहित शीर्ष स्थानमा छ । पराजित भएको नापोली १५ अंक सहित दोस्रो स्थानमा रहेको छ ।

यसैगरी अर्को खेलमा इन्टर मिलानले कालगिरि माथि २–० को जित निकालेको छ । मिलानको जितमा १२औैं मिनेटमा मार्टिनेजले सुरुआती गोल गरेका थिए भने ८९ औं मिनेटमा माटियोले दोस्रो गोल थपेका थिए । जितसँगै इन्टर मिलान लिग तालिकाको चौथो स्थानमा छ ।

त्यस्तै  रोमाले लाजियो माथि ३–१ को जित निकालेको छ । रोमा लिग तालिकाको छैटौं स्थानमा छ ।