भलिबलमा विशिष्ट योगदान गर्ने इच्छा छ : प्रधानमन्त्री

चैत २८, २०७९ मंगलबार १८:३३:४१ | उज्यालो सहकर्मी

काठमाण्डाै – प्रधानमन्त्री पुष्पकमल दाहाल प्रचण्डले दोस्रो कार्यकालमा घोषणा गरेको राष्ट्रिय खेल भलिबललाई विशिष्ट योगदान गर्ने इच्छा भएको भन्दै आउन लागेको नीति तथा कार्यक्रम र बजेटमा सम्बोधन गर्ने बताउनुभएको छ ।

स्व. नेता पोस्टबहादुर बोगटीको स्मृतिमा आयोजना भएको प्रथम पोस्टबहादुर बोगटी स्मृति कप राष्ट्रिय पुरुष भलिबल प्रतियोगिता २०७९ को उद्घाटनपछि बोल्दै प्रधानमन्त्री प्रचण्डले भलिबलमा विशिष्ट योगदान गर्ने इच्छा रहेको बताउनुभएको हो । दोस्रो कार्यकालमा भलिबललाई राष्ट्रिय खेल घोषणा गरे पनि भलिबल विकासका लागि अपेक्षाअनुसार नभएको भन्दै उहाँले तेस्रो कार्यकालमा भलिबललाई अगाडि बढाउन सहयोग गर्ने वाचा गर्नुभएको हो ।

पोस्टबहादुर बोगटीको सम्झनामा आयोजना गरिएको प्रतियोगितालाई पोस्टबहादुर प्रतिष्ठानले आयोजना गरेको हो । प्रतियोगितामा तीन विभागीय र तीन प्रदेशका टोलीकाे सहभागिता छ ।

कार्यक्रमलाई सम्बोधन गर्दै राष्ट्रिय खेलकुद परिषद् (राखेप) का सदस्य सचिव टंकलाल घिसिङले चीनको हान्झाउमा आउँदाे वर्ष हुन लागेको एसियन गेम्समा महिला टाेलीकाे सहभागिता निश्चित भइसकेको अवस्थामा पुरुष टाेलीकाे पनि सहभागिता आवश्यक रहेको भन्दै तयारीमा राखेप जुटिरहेको बताउनुभयो ।

त्रिपुरेश्वरकाे राखेपकाे कभर्ड हलमा आयोजना भएकाे प्रतियोगिता पाँच दिनसम्म सञ्चालन हुनेछ । लिग कप नकआउटको आधारमा आयोजना हुने प्रतियोगिताको विजेताले चार लाख र उपविजेताले दुई लाख रुपैयाँ प्राप्त गर्नेछन् । यस्तै तेस्रो हुने टोलीले एक लाख र सान्त्वना टोलीले ५० हजार रुपैयाँ पाउनेछ । यस्तै विधागत उत्कृष्ट सर्भर, लिबेरो, स्पाइकर, ब्लकर, सेटर र प्रशिक्षकले जनही १० हजार रुपैयाँ पाउनेछन् भने सर्वोत्कृष्ट खेलाडीले १५ हजार रुपैयाँ पाउनेछन् ।

अन्तिम अपडेट: कात्तिक १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्