काठमाण्डौ – जर्मनीको बर्लिनमा नेपालको पर्यटन प्रवर्द्धन कार्यक्रम सम्पन्न भएको छ । विश्वकै ठूलो पर्यटन व्यापार मेला ‘आइटिबी’ बर्लिन २०२४ मा नेपालको पर्यटन प्रवर्द्धन गरिएको प्यासिफिक एसिया ट्राभल एसोसिएसन (पाटा) नेपाल च्याप्टरले जनाएको छ ।

पर्यटन उद्योगसम्बन्धी आयोजना भएको प्रवर्द्धनात्मक मेला विश्वकै सबैभन्दा ठूलो एवम् अग्रणी ‘ट्राभल ट्रेड शो’का रुपमा स्थापित कार्यक्रम हो ।

यस वर्ष सम्पन्न आइटिबी बर्लिनमा एक सय ७० देशबाट पाँच हजार पाँच सयभन्दा बढी बिक्रेता तथा प्रदर्शक कम्पनीसहित विश्वभरिबाट पर्यटनकर्मी, पर्यटन उद्योगका क्रेता र व्यापार आगन्तुक पुगेका थिए ।

जर्मनीका लागि नेपाली राजदूत रामकाजी खड्काले नेपाल प्याभिलियनको उद्घाटन गर्दै देशको पर्यटन प्रवर्द्धनका लागि विश्वको सबैभन्दा ठूलो स्थलमा नेपालको महत्वपूर्ण उपस्थिति रहनु खुसीको कुरा भएको बताउनुभयो ।

पाटा नेपाल च्याप्टरका अध्यक्ष विभूति चन्द ठाकुरले मेलाको माध्यमबाट नेपालको छवि उच्च राख्दै देशको पर्यटनको बजारीकरण र प्रवर्द्धनका सहयोग पुगेको बताउनुभयो ।